O‘zbekiston Respublikasi Mustaqilligining 33 yillik bayrami munosabati bilan “Bir bo‘lsak-yagona xalqmiz, birlashsak Vatanmiz!” shiori ostida Milliy gvardiya Sirdaryo viloyati bo‘yicha boshqarmasi tomonidan viloyat Yoshlar ishlari agentligi bilan hamkorlikda Baxt shahrida joylashgan Respublika o‘g‘il bolalar o‘quv-tarbiya muassasasida vatanparvarlik va sport tadbirlari tashkil etildi.
Tadbiring ochilish marosimidan so‘ng muassasa tarbiyalanuvchilari uchun uyushtirilgan mini futbol, shaxmat-shashka, stol tennisi, kamondan otish, arqon tortish bo‘yicha musobaqalar o‘tkazildi. Yoshlar musobaqa davomida muddatli harbiy xizmatchilar bilan sport turlari bo‘yicha bellashuvlarga kirishishdi. Albatta bir yil oldin maktab o‘quvchisi bo‘lgan bugungi muddatli harbiy xizmatchilar, bu yerdagi tarbiyalanuvchilarda vatanparvarlik ruhini kuchaytirishda yaxshi namuna desak mubolag‘a bo‘lmaydi.
Ko‘tarinki ruhda bo‘lib o‘tgan musobaqalarda g‘oliblar aniqlanib, tashkilotchilarning diplom, medal, kubok va esdalik sovg‘alarini qabul qilib olishdi.
Tadbirning ikkinchi qismida yoshlar bilan uchrashuv bo‘lib o‘tdi. Ularga bugunda yoshlar uchun yaratilayotgan imkoniyatlar to‘g‘risida maʼlumotlar berildi. Shuningdek, ularning murojaatlari ham tinglandi. Ular tomonidan bildirilgan WI-FI markazi, kitoblar jamlanmasi kabi takliflari qabul qilinib, shu joyning o‘zida hal etildi. Tadbir madaniy ko‘ngilochar dastur bilan davom etdi. Viloyat madaniyat bo‘limi sanʼatkorlari tarbiyalanuvchilarga o‘zlarining badiiy chiqishlari bilan xush kayfiyat bag‘ishladi.
