O‘zbekiston Respublikasi Milliy gvardiyasi Jamoat xavfsizligi universiteti haqida: kecha va bugun!
Mamlakatimizda qo‘mondonlik va texnik kadrlar tayyorlaydigan, bir nechta o‘quv muassasalarini birlashtirgan ko‘p bosqichli harbiy taʼlim tizimi yaratilgan. Milliy gvardiya Jamoat xavfsizligi universiteti shulardan biridir.
Mazkur bilim yurti, 1990 yil 15 oktyabrda Ichki ishlar vazirligining Oliy kurslari bazasida malakali ofitser kadrlarni tayyorlash va qayta tayyorlash uchun tashkil etilib, (SSSR IIV Ichki qo‘shinlari) Toshkent oliy harbiy texnik bilim yurti deb nomlangan.
Toshkent oliy harbiy-texnik bilim yurti, O‘zbekiston Respublikasi Prezidentining 1992 yil 10 yanvardagi Farmoni asosida O‘zbekiston Respublikasi yurisdiksiyasiga olinib, Ichki ishlar vazirligi tizimiga kiritilgan.
Bilim yurti 1991 yili ilk kursantlarni qabul qilib, 1995 yilda dastlabki bitiruvchilarni tayyorlab chiqargan.
O‘zbekiston Respublikasi IIV Toshkent oliy harbiy-texnik bilim yurti: IIV qo‘shinlari va idoralari, O‘zbekiston Respublikasi Qurolli Kuchlari uchun yuqori kasb mahoratiga ega bo‘lgan mutaxassislarni tayyorlash, qayta tayyorlash va malakasini oshirish bilan shug‘ullanadigan, mamlakat xavfsizligi vazifalarini samarali bajarishga qodir bo‘lgan oliy harbiy taʼlim muassasasi hisoblangan.
2017 yil aprel oyida O‘zbekiston Respublikasi IIV Toshkent oliy harbiy-texnik bilim yurti, O‘zbekiston Respublikasi Prezidentining 2017 yil 10 apreldagi “Ichki ishlar organlarining faoliyati samaradorligini tubdan oshirish, jamoat tartibini, fuqarolar huquqlari, erkinliklari va qonuniy manfaatlarini ishonchli himoya qilishni taʼminlashda ularning masʼuliyatini kuchaytirish chora-tadbirlari to‘g‘risida”gi PF-5005-son Farmoniga muvofiq, O‘zbekiston Respublikasi Ichki ishlar vazirligi Harbiy-texnik instituti etib qayta tashkil qilingan.
2017 yil avgust oyida O‘zbekiston Respublikasi Milliy gvardiyasi tashkil etilganidan so‘ng, sohaga malakali va professional kadrlarni tayyorlash zaruriyatidan kelib chiqqan holda, O‘zbekiston Respublikasi Prezidentining 2017 yil noyabridagi Qaroriga muvofiq O‘zbekiston Respublikasi IIV Harbiy-texnik instituti, O‘zbekiston Respublikasi Milliy gvardiyasi tasarrufiga o‘tkazildi.
O‘zbekiston Respublikasi Jamoat xavfsizligi universiteti O‘zbekiston Respublikasi Prezidentining 2021 yil 15 apreldagi “Jamoat xavfsizligini taʼminlash sohasida professional kadrlarni tayyorlash tizimini yana-da takomillashtirish chora-tadbirlari to‘g‘risida”gi PQ-5077-son qaroriga muvofiq Milliy gvardiya Harbiy-texnik instituti negizida qayta tashkil etildi.
Universitetga 2021/2022 o‘quv yilidan boshlab talabalar qabul qilina boshlagan. Bakalavriatda 15, magistraturada 8 yo‘nalish bor. Bugungi kunda bakalavriatda mingdan ortiq kursant, maxsus yo‘nalish, sirtqi taʼlim va magistraturada yana shuncha yoshlar tahsil olmoqda. Ularga jami 209 nafar o‘qituvchi, professor va fan doktorlari yurisprudensiya, iqtisodiyot va psixologiya taʼlim yo‘nalishlari bo‘yicha saboq berib kelmoqda.
Hozirda, Universitet bitiruvchilari Milliy gvardiya va Ichki ishlar vazirligining jamoat xavfsizligini taʼminlash, jamoat tartibini saqlash hamda qo‘riqlash tuzilmasi, yo‘l harakati xavfsizligi va pasport tizimi yo‘nalishlari bo‘linmalarida, shuningdek, Qurolli Kuchlar va boshqa huquqni muhofaza qiluvchi organlar uchun esa harbiy diplomatiya, yurisprudensiya, iqtisodiyot, muhandislik-texnik, tarbiyaviy-psixologik va qo‘mondonlik-taktik faoliyat sohalarida xizmat qilib kelmoqdalar.
Joriy yilning 29 avgust kuni O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Jamoat xavfsizligi universitetiga tashrif buyurib amalga oshirilgan ishlar bilan yaqindan tanishdi.
Prezidentimiz ofitser va talabalar bilan muloqotda bo‘lib, dual taʼlimni keng joriy qilish, o‘quv dasturini bugungi xavf-xatarlarga moslashtirib borish bo‘yicha ko‘rsatmalar berdi.
Hozirda, Davlatimiz rahbari tomonidan belgilab berilgan vazifalarning amaliy ijrosi Milliy gvardiya qo‘mondoni nazoratiga olinib, Jamoat xavfsizligi universiteti rahbariyati boshchiligida tizimli ishlar yo‘lga qo‘yilgan.
