O‘zbekiston mustaqilligining 32 yilligi munosabati bilan “Yangi hayot uchun, Yangi O‘zbekiston uchun” shiori ostida Milliy gvardiya tizimidagi harbiy xizmatchi va xodimlarning farzandlari o‘rtasida sportning mini-futbol turi bo‘yicha “Mustaqillik kubogi” musobaqasi o‘tkazildi
Ikki kun davomida bo‘lib o‘tgan musobaqalarda Milliy gvardiyaning Toshkent shahri va viloyati bo‘yicha boshqarmalari, Qo‘riqlash xizmatining Toshkent shahri va viloyati boshqarmalari, Jamoat xavfsizligi universiteti, shuningdek, Chirchiq shahri, Qibray va Uchtepa tumanlarida joylashgan brigadalaridan tashrif buyurgan “Qalqonchi”, “Lochin”, “Yosh gvardiyachi”, “Do‘stlik”, “Chaqqon”, “Alplar”, “Yoshlar”, “Jasorat” nomli 8 ta jamoa ikkita gruhga bo‘lingan holda maydonda saf tortishdi. Qurʼa tashlangandan so‘ng jamoalar o‘yinni boshlab yuborishdi.
10-12 yoshli o‘g‘il bolalar o‘rtasida o‘tkazilgan mazkur musobaqa qizg‘in baxslarga boy o‘tdi. Har bir jamoa g‘oliblik uchun bor kuch g‘ayratini ishga solishdi. Maydonga tushgan 14 nafar o‘quvchi chaqqonligi, futbolni naqadar o‘zlashtirganligini, milionlar o‘yinining qanchalik ommalashganligini ko‘rsatib berishdi. Ota-onalar, muhlislar ham o‘yinlarni hayajon bilan kuzatib borishdi. Guruhlarda g‘olib chiqgan “Qalqonchi”, “Lochin”, “Yosh gvardiyachi”, “Do‘stlik”, jamoalari yarim finalda o‘zaro bellashishdi. Finalda barcha bolalardan yaxshi o‘yin ko‘rsatgan “Qalqonchi” va “Lochin” jamoalari eng kuchli nomini aniqlash uchun maydonda to‘p tepishdi. Hayajonli, kutilmagan vaziyatlarga boy o‘tgan final 1:1 hisobi bilan yakunlanib, g‘olib penaltilar seriyasida aniqlandi. Bu gal “Qalqonchi” jamoasi bolalarining qo‘li baland kelib, 2:1 hisobida “Mustaqillik kubogi” sohibiga aylanishdi. Barcha o‘yinlarning qizg‘in o‘tishini taʼminlash uchun Milliy gvardiya ashula va raqs ansambli boshlovchilari sharhlab borishdi. Harbiy orkestor sadolari esa bolalarga ko‘tarinki ruh bag‘ishladi. Musobaqaning holis va haqqoni o‘tishi uchun “Paxtakor kids” klubi hakamlari o‘yinlarni boshqarib borishdi. Taqdirlash marosimi ham yoshlarning yodida saqlanib qoladigan bo‘ldi. 3-o‘rinni “Yosh gvardiyachi” va “Do‘stlik” jamoalari qo‘lga kiritdi. 2-o‘ringa “Lochin” va 1-o‘ringa “Qalqonchi” jamoalari sazovor bo‘lishdi. Tantanali marosimda bolalarni Milliy gvardiya qo‘mondoni o‘rinbosari polkovnik S. Mamayusupov va Markaziy devon boshqarma boshliqlari, “Paxtakor kids” klubi rahbariyati diplom, medal, kubok va sovg‘alar bilan taqdirladilar.
Albatta bunday sport tadbirlari yoshlarni jismonan yetuk va maʼnan barkamol bo‘lib voyaga yetishlarida muhim ahamiyat kasb etadi. Endilikda mazkur turnir kelgusida muntazam ravishda o‘tkaziladigan bo‘ldi.
