Ўзбекистон мустақиллигининг 32 йиллиги муносабати билан “Янги ҳаёт учун, Янги Ўзбекистон учун” шиори остида Миллий гвардия тизимидаги ҳарбий хизматчи ва ходимларнинг фарзандлари ўртасида спортнинг мини-футбол тури бўйича “Мустақиллик кубоги” мусобақаси ўтказилди
Икки кун давомида бўлиб ўтган мусобақаларда Миллий гвардиянинг Тошкент шаҳри ва вилояти бўйича бошқармалари, Қўриқлаш хизматининг Тошкент шаҳри ва вилояти бошқармалари, Жамоат хавфсизлиги университети, шунингдек, Чирчиқ шаҳри, Қибрай ва Учтепа туманларида жойлашган бригадаларидан ташриф буюрган “Қалқончи”, “Лочин”, “Ёш гвардиячи”, “Дўстлик”, “Чаққон”, “Алплар”, “Ёшлар”, “Жасорат” номли 8 та жамоа иккита груҳга бўлинган ҳолда майдонда саф тортишди. Қуръа ташлангандан сўнг жамоалар ўйинни бошлаб юборишди.
10-12 ёшли ўғил болалар ўртасида ўтказилган мазкур мусобақа қизғин бахсларга бой ўтди. Ҳар бир жамоа ғолиблик учун бор куч ғайратини ишга солишди. Майдонга тушган 14 нафар ўқувчи чаққонлиги, футболни нақадар ўзлаштирганлигини, милионлар ўйинининг қанчалик оммалашганлигини кўрсатиб беришди. Ота-оналар, муҳлислар ҳам ўйинларни ҳаяжон билан кузатиб боришди. Гуруҳларда ғолиб чиқган “Қалқончи”, “Лочин”, “Ёш гвардиячи”, “Дўстлик”, жамоалари ярим финалда ўзаро беллашишди. Финалда барча болалардан яхши ўйин кўрсатган “Қалқончи” ва “Лочин” жамоалари энг кучли номини аниқлаш учун майдонда тўп тепишди. Ҳаяжонли, кутилмаган вазиятларга бой ўтган финал 1:1 ҳисоби билан якунланиб, ғолиб пеналтилар сериясида аниқланди. Бу гал “Қалқончи” жамоаси болаларининг қўли баланд келиб, 2:1 ҳисобида “Мустақиллик кубоги” соҳибига айланишди. Барча ўйинларнинг қизғин ўтишини таъминлаш учун Миллий гвардия ашула ва рақс ансамбли бошловчилари шарҳлаб боришди. Ҳарбий оркестор садолари эса болаларга кўтаринки руҳ бағишлади. Мусобақанинг ҳолис ва ҳаққони ўтиши учун “Пахтакор кидс” клуби ҳакамлари ўйинларни бошқариб боришди. Тақдирлаш маросими ҳам ёшларнинг ёдида сақланиб қоладиган бўлди. 3-ўринни “Ёш гвардиячи” ва “Дўстлик” жамоалари қўлга киритди. 2-ўринга “Лочин” ва 1-ўринга “Қалқончи” жамоалари сазовор бўлишди. Тантанали маросимда болаларни Миллий гвардия қўмондони ўринбосари полковник С. Мамаюсупов ва Марказий девон бошқарма бошлиқлари, “Пахтакор кидс” клуби раҳбарияти диплом, медал, кубок ва совғалар билан тақдирладилар.
Албатта бундай спорт тадбирлари ёшларни жисмонан етук ва маънан баркамол бўлиб вояга етишларида муҳим аҳамият касб этади. Эндиликда мазкур турнир келгусида мунтазам равишда ўтказиладиган бўлди.
