Hududlarda aholi muammolarini aniqlash va ularni yechimini topish, shuningdek, kriminogen vaziyat barqarorligini taʼminlash yuzasidan Davlatimiz Rahbari topshiriqlari ijrosi Milliy gvardiya qo‘mondoni general-mayor R. Djurayev boshchiligidagi ishchi guruh tomonidan o‘rganilib, natijalari sarhisob qilindi
Bugun Qashqadaryo viloyati hokimligi binosida ishchi guruh tomonidan o‘rganish chog‘ida aniqlangan aholini qiynab kelayotgan muammolar va ularni hal etish ishlari natijalari sarhisob qilindi, shuningdek, bajarilishi lozim bo‘lgan hamkorlikdagi ishlar bo‘yicha yo‘l xaritasi ishlab chiqqan holda, tizimli chora-tadbirlar amalga oshirish yuzasidan topshiriqlar berildi.
Chunonchi, hafta davomida Ishchi guruh tashabbusi bilan viloyat hududida jami 24091 ta xonadonga suyultirilgan gaz baloni yetkazilib, 814 ta mahallani tabiiy gaz bilan uzluksiz taʼminlash yo‘lga qo‘yildi, 24 km ichimlik suvi hamda 5 km tabiiy gaz tarmoqlari taʼmirlandi, 2 km ichki yo‘llarga shag‘al yotqizildi, 14 ta maktab va 20 ta maktabgacha taʼlim muassasasi, shuningdek, 11 ta talabalar turar joyi isitish tizimlarining holati o‘rganildi.
Isteʼmol bozorlaridagi narx-navo barqarorligini taʼminlash, oziq-ovqat zaxiralarini hamda tadbirkorlar uchun yanda qulay sharoitlar yaratish maqsadida viloyatda 72 ta arzonlashtirilgan yarmarka tashkil etilib, ularda jami 393,8 tonna kundalik ehtiyoj isteʼmol tovarlari savdoga qo‘yildi. Shu bilan bir qatorda, o‘z mahsulotini to‘g‘ridan-to‘g‘ri sotish istagida bo‘lgan 136 ta fermer xo‘jaligi egalariga o‘z mahallalarida qishloq xo‘jaligi mahsulotlarini sotish uchun savdo rastalari tashkil etishga ko‘maklashildi.
Ishsizlik va kambag‘allikni qisqartirish, oilaviy tadbirkorlik hamda yoshlar va ayollarning tashabbuskor loyihalariga ko‘maklashish maqsadida viloyat hududida joylashgan barcha monomarkazlar, mehnat yarmarkalari, kovorking markazlari faoliyatining natijadorligi o‘rganilib, natijasi bo‘yicha 186 nafar fuqaro doimiy ish o‘rinlariga joylashtirildi. Shu bilan birga, 205 nafari kasbga o‘qitishga yuborildi, 15 nafariga ishsizlik nafaqasi tayinlandi. Shu bilan bir qatorda, 236 nafar fuqarolar o‘zini-o‘zi band qilish, 10 nafari yakka tartibdagi tadbirkorlik qilish orqali mehnatga jalb etildi.
O‘tkazilgan sayyor qabullar davomida fuqarolardan kelib tushgan 129 ta murojaatdan 74 tasi ijobiy hal etilib, 58 tasi nazoratga olindi.
Viloyat hududida harakat xavfsizligini taʼminlash, yo‘lovchi va haydovchilarga qulayliklar yaratish maqsadida qo‘shimcha ravishda 327 ta yo‘l belgilari o‘rnatilib, 8 ta svetofor taʼmirlandi hamda 47 ta joyda yo‘l belgilarini tiklash kabi boshqa bir qator ishlar amalga oshirildi.
Shuningdek, mahallalarda aholining murojaatlari bilan ishlash ahvoli va ularni qanoatlantirish darajasi tanqidiy o‘rganilib, bugungi kunda jami 121 ta mahalla fuqarolar yig‘inlarida 664 ta uyali aloqa xizmatlari ko‘rsatilishi taʼminlandi.
