Poytaxtimizdagi umumiy o‘rta taʼlim maktablarida tashkil etilgan “Yosh gvardiyachilar” ixtisoslashtirilgan sinflari o‘quvchilarining vaʼda berish qasamyodi tantanali o‘tkazildi
Maktabgacha va maktab taʼlimi vazirligi bilan hamkorlikda o‘quvchi yoshlarni Vatanparvarlik ruhida tarbiyalash, ularning bilim salohiyatini hamda harbiy sohaga bo‘lgan qiziqishini yana-da oshirish maqsadida maktablarda “Yosh gvardiyachilar” ixtisoslashtirilgan harbiy vatanparvarlik sinflarini tashkil etish bo‘yicha qo‘shma qaror qabul qilingan edi.
Bugun mazkur qaror asosida respublikamiz bo‘ylab bir qator umumiy o‘rta taʼlim maktablarida “Yosh gvardiyachilar” sinflari bosqichma-bosqich tashkil etilmoqda.
Xususan, poytaxtimizdagi “G‘alaba bog‘i” yodgorlik majmuasida mazkur ixtisoslashtirilgan sinf o‘quvchilarining vaʼda berish qasamyodiga bag‘ishlangan tantanali tadbir ham yuqori shukuhda bo‘lib o‘tdi.
Marosimda Milliy gvardiya Markaziy devoni masʼul rahbarlari, tegishli mutasaddilar, maktab maʼmuriyati, o‘quvchilar hamda ularning ota-onalari va faxriy mehmonlar ishtirok etishdi.
Mazkur tadbir davlat madhiyasining ijrosi bilan boshlandi hamda so‘zga chiqqanlar, yosh gvardiyachilarni tabriklab, ularning kelgusidagi o‘qishlariga, muvaffaqiyatlariga ishonch bildirishdi.
Shundan so‘ng, o‘quvchi yoshlar tomonidan o‘zlarining masʼuliyatlarini anglagan holda kelajakda chuqur bilim egasi bo‘lishda va vatanimizga sadoqatli hamda jamiyat uchun foydali shaxs bo‘lib yetishishda bor kuch-g‘ayratini safarbar etishga tantanali vaʼda berishdi.
Uchrashuv so‘ngida Milliy gvardiya harbiylarining jangovar ko‘rgazmali-harbiy hamda Jamoat xavfsizligi universiteti kursantlarining safona chiqishlari namoyish etildi.
