“POLO” MUSOBAQASI O‘TKAZILDI
Ot sporti bo‘yicha qabul qilingan yo‘l xaritalariga muvofiq yurtimizda bir qator polo musobaqalari xalqaro standartlarga mos ravishda yuqori saviyada tashkil etilmoqda. Xususan, kuni kecha Toshkent viloyati Nurafshon shahrida ham yoshlar o‘rtasida ot sporti bo‘yicha musobaqa bo‘lib o‘tdi.
Musobaqada 4 ta jamoa Milliy gvardiya Toshkent shahri va viloyati bo‘yicha boshqarmalari, Jamoat xavfsizligi universiteti jamoalari hamda Nurafshon shahar ot sporti ustalaridan iborat jamoalar g‘oliblik uchun kurashga kirishishdi. Dastavval maydonda tashkil etilgan qurol yarog‘lar namoyishi o‘tkazildi.
Shundan so‘ng Milliy gvardiya faxriy qorovul bo‘linmasi kavaleriya eskadroni harbiy xizmatchilarining ot ustida ko‘rgazmali chiqishlari havola etildi va polo o‘yiniga start berildi. Tadbirni kuzatish va ot sportiga yoshlarni qiziqtirish maqsadida viloyatdagi umumiy o‘rta taʼlim maktablari, mehribonlik uylari bolalari hamda poytaxtimizdagi Muhammad al-Xorazmiy nomidagi ixtisoslashtirilgan maktab o‘quvchilari taklif etildi.
Polo musobaqasi qizg‘in va murosasiz bahslarga boy bo‘ldi. O‘yinlarning xolis o‘tishini O‘zbekiston polo federatsiyasi hakamlari taʼminlab berishdi. Yakunda Milliy gvardiya Toshkent viloyati bo‘yicha boshqarmasi jamoasi birinchi, Nurafshon shahar va Jamoat xavfsizligi universiteti jamoalari 2, 3 o‘rinlarni qo‘lga kiritishdi.
G‘olib va sovrindorlar Milliy gvardiya qo‘mondonligi va Nurafshon shahar hokimligi tomonidan munosib rag‘batlantirildi.
