“ПОЛО” МУСОБАҚАСИ ЎТКАЗИЛДИ
От спорти бўйича қабул қилинган йўл хариталарига мувофиқ юртимизда бир қатор поло мусобақалари халқаро стандартларга мос равишда юқори савияда ташкил этилмоқда. Хусусан, куни кеча Тошкент вилояти Нурафшон шаҳрида ҳам ёшлар ўртасида от спорти бўйича мусобақа бўлиб ўтди.
Мусобақада 4 та жамоа Миллий гвардия Тошкент шаҳри ва вилояти бўйича бошқармалари, Жамоат хавфсизлиги университети жамоалари ҳамда Нурафшон шаҳар от спорти усталаридан иборат жамоалар ғолиблик учун курашга киришишди. Даставвал майдонда ташкил этилган қурол яроғлар намойиши ўтказилди.
Шундан сўнг Миллий гвардия фахрий қоровул бўлинмаси кавалерия эскадрони ҳарбий хизматчиларининг от устида кўргазмали чиқишлари ҳавола этилди ва поло ўйинига старт берилди. Тадбирни кузатиш ва от спортига ёшларни қизиқтириш мақсадида вилоятдаги умумий ўрта таълим мактаблари, меҳрибонлик уйлари болалари ҳамда пойтахтимиздаги Муҳаммад ал-Хоразмий номидаги ихтисослаштирилган мактаб ўқувчилари таклиф этилди.
Поло мусобақаси қизғин ва муросасиз баҳсларга бой бўлди. Ўйинларнинг холис ўтишини Ўзбекистон поло федерацияси ҳакамлари таъминлаб беришди. Якунда Миллий гвардия Тошкент вилояти бўйича бошқармаси жамоаси биринчи, Нурафшон шаҳар ва Жамоат хавфсизлиги университети жамоалари 2, 3 ўринларни қўлга киритишди.
Ғолиб ва совриндорлар Миллий гвардия қўмондонлиги ва Нурафшон шаҳар ҳокимлиги томонидан муносиб рағбатлантирилди.
