Poytaxtimizda Milliy gvardiya xodimlari tomonidan psixotrop dori vositalarining noqonuniy aylanmasiga doir holatlar aniqlandi
24-noyabr kuni soat 13:20 larda “Chorsu” bozorida Milliy gvardiya xodimlari tomonidan shubhali shaxs toʻxtatilib, xolislar ishtirokida oʻrnatilgan tartibda koʻzdan kechirilganda uning yonidan mamlakatimizda erkin savdosi taqiqlangan va kuchli taʼsir qiluvchi “Regapen” psixotrop dori vositasi borligi aniqlandi.
Mazkur holat yuzasidan olib borilgan dastlabki oʻrganishlar natijasida ushbu fuqaro 35 yoshli Y.T. ekanligi aniqlanib, hozirda Shayxontohur tumani IIB xodimlari tomonidan surishtiruv ishlari davom ettirilmoqda.
Joriy yilning 25-noyabr kuni esa olingan xabarga koʻra, “Eski Juva” dehqon bozori hududida Milliy gvardiya xodimlari tomonidan 23 yoshli fuqaro N.A. toʻxtatilib xolislar ishtirokida tekshirilganda, uning yonida 26 dona psixotrop dori vositalari borligi aniqlangan. Qoʻlga olingan shaxs va psixotrop dori vositalari belgilangan tartibda Shayxontohur tumani IIB xodimlariga topshirilgan hozirda holat yuzasidan surishtiruv ishlari olib borilmoqda.
Shuningdek, shu kuni “Oʻrikzor” savdo majmuasi hududida Milliy gvardiya xodimlari va IIBB patrul post xizmati xodimlari hamkorligida olib borilgan tezkor tadbir davomida 30 yoshli fuqaro T.D. qoʻlga olinib, uning yonidan 4 dona “Reduksin” psixotrop dori vositasi borligi aniqlandi. Qoʻlga olingan shaxs tergov harakatlari oʻtkazish uchun Uchtepa tumani IIBga olib borildi.
