Пойтахтимизда Миллий гвардия ходимлари томонидан психотроп дори воситаларининг ноқонуний айланмасига доир ҳолатлар аниқланди
24 ноябрь куни соат 13:20 ларда “Чорсу” бозорида Миллий гвардия ходимлари томонидан шубҳали шахс тўхтатилиб, холислар иштирокида ўрнатилган тартибда кўздан кечирилганда унинг ёнидан мамлакатимизда эркин савдоси тақиқланган ва кучли таъсир қилувчи “Regapen” психотроп дори воситаси борлиги аниқланди.
Мазкур ҳолат юзасидан олиб борилган дастлабки ўрганишлар натижасида ушбу фуқаро 35 ёшли Й.Т. эканлиги аниқланиб, ҳозирда Шайхонтоҳур тумани ИИБ ходимлари томонидан суриштирув ишлари давом эттирилмоқда.
Жорий йилнинг 25 ноябрь куни эса олинган хабарга кўра, “Эски Жува” деҳқон бозори ҳудудида Миллий гвардия ходимлари томонидан 23 ёшли фуқаро Н.А. тўхтатилиб холислар иштирокида текширилганда, унинг ёнида 26 дона психотроп дори воситалари борлиги аниқланган. Қўлга олинган шахс ва психотроп дори воситалари белгиланган тартибда Шайхонтоҳур тумани ИИБ ходимларига топширилган ҳозирда ҳолат юзасидан суриштирув ишлари олиб борилмоқда.
Шунингдек, шу куни “Ўрикзор” савдо мажмуаси ҳудудида Миллий гвардия ходимлари ва ИИББ патрул пост хизмати ходимлари ҳамкорлигида олиб борилган тезкор тадбир давомида 30 ёшли фуқаро Т.Д. қўлга олиниб, унинг ёнидан 4 дона “Reduksin” психотроп дори воситаси борлиги аниқланди. Қўлга олинган шахс тергов ҳаракатлари ўтказиш учун Учтепа тумани ИИБга олиб борилди.
