OT SPORTI BO‘YICHA HALQARO TURNIRDAGI NAVBATDAGI G‘ALABA MUBORAK
Joriy yilning 28-30 may kunlari Qirg‘iziston Respublikasining Bishkek shahrida ot sporti konkur yo‘nalishidagi “FEI Jumping CSIO1*-W World Cup Eurasian League i FEI Jumping Nations Cup” xalqaro musobaqasi bo‘lib o‘tdi.
Mazkur musobaqaning Gran Pri 150 hamda 130 m balandligida terma jamoamiz sportchi chavandozlari yuqori o‘rinlarni qo‘lga kiritdilar. Musobaqaning yakuniy natijalariga ko‘ra O‘zbekiston milliy terma jamoasi 1 o‘rinni qo‘lga kiritgan bo‘lsa, 2 o‘rin Rossiya Federatsiyasiga va 3 o‘rin Qirg‘iziston Respublikasi chavandozlariga nasib etdi.
Xabaringiz bor mazkur ot sportining to‘siqlardan sakrash turi bo‘yicha nufuzli CSIO1-W "FEI Jumping World Cup" va CSIO 3* "LONGINES FEI Jumping Nations Cup" xalqaro turniri birinchi bosqichi 22-25 aprel kunlari mamlakatimizda bo‘lib o‘tib Toshkent shahri ilk marotaba mezbonlik qilgan edi.
Ushbu xalqaro musobaqa beshta bosqichdan iborat bo‘lib, birinchi bosqichi yuqorida taʼkidlaganimizdek O‘zbekistonda (22-25 aprelda) bo‘lib o‘tgan bo‘lsa , ikkinchi bosqichi Qirg‘izistonda (28-30 may kunlari) o‘tkazildi va qolgan bosqichlari Qozog‘iston Respublikasi va Rossiya Federatsiyasida bo‘lib o‘tadi va u yerda birinchi uchlikga kirgan jamoa Ispaniyada Barselona va Amerika qitʼasida bo‘lib o‘tadigan musobaqalarga yo‘llanma olishadi.
Milliy terma jamoa tarkibida 20 nafar sportchi ishtirok etib ulardan 6 ta chavandoz yuqori natijalarni ko‘rsatib kelmoqda.
Ular Ot sporti federatsiyasi chavandozlari Kurbanov Bekzod va Tuyakbayev Nurjan hamda Milliy gvardiya ot sporti bo‘yicha respublika oliy sport mahorati maktabining chavandozlari Umid Kamilov, Saidamirxon Turgunbayev, Baxromjon Gaziyev va Azam Tolibayevlar bo‘lib, o‘zlariga biriktirilgan otlarni mohirona boshqargan holda holda Finalga yo‘llanma olishda o‘z hissalarini qo‘shib kelmoqdalar.
Sportchilarimizga keyingi bosqich musobaqalarida ham zafarli yo‘llarni tilab qolamiz.
