ISLOHOTLARNING AMALDAGI IJROSI
Yurtboshimiz taʼkidlaganidek, O‘zbekistonning ertangi kuniga ishonchni-mustahkamlash, ajdodlarga munosib bo‘lish uchun islohotlarni ilmdan boshlash kerak. Chunki ilmsiz hech bir sohada natija bo‘lmaydi.
Keyingi uch yilda bu boradagi muammolarni samarali hal etish, mamlakatimizda kadrlar tayyorlash tizimini tubdan takomillashtirish bo‘yicha keng ko‘lamli ishlar amalga oshirildi. Shu maqsadda qator Farmon va qarorlar qabul qilinib, bu boradagi kompleks saʼy-harakatlar uchun puxta huquqiy zamin yaratildi.
Davlatimiz rahbarining “Jamoat xavfsizligini taʼminlash sohasida professional kadrlarni tayyorlash tizimini yana-da takomillashtirish chora-tadbirlari to‘g‘risida” gi qaroriga binoan Milliy gvardiya Harbiy-texnik institutining Jamoat xavfsizligi universiteti etib qayta tashkil etilganligi olib borilayotgan islohotlarning mantiqiy davomidir.
Mazkur qarorning ijrosi yuzasidan joriy yilning 11 may kuni Milliy gvardiya qo‘mondoni general-mayor R.Djurayevning O‘zbekiston Respublikasi Jamoat xavfsizligi universiteti professor-o‘qituvchilari bilan bo‘lib o‘tgan navbatdagi uchrashuvi, tarkibiy va hududiy bo‘linmalar mutasaddi rahbarlari ishtirokidagi selektor yig‘ilishi tarzida o‘tkazildi.
Yig‘ilishda mamlakatimizning ertangi kuni zamonaviy kadrlarga bog‘liq ekani taʼkidlanib, Universitetdagi taʼlim tizimini tubdan takomillashtirgan holda, o‘quv jarayonini zamonaviy shakl va uslublari, pedagogik va axborot texnologiyalarini qo‘llagan holda Qurolli Kuchlar va huquqni muhofaza qiluvchi organlari uchun oliy malakali ilmiy-pedagogik kadrlarni tayyorlash, shuningdek jamoat xavfsizligini taʼminlashning eng dolzarb muammolari bo‘yicha kompleks ilmiy tadqiqotlar olib borish bo‘yicha professor-o‘qituvchilar oldidagi muhim vazifalar belgilab berildi.
Shu bilan birga Milliy gvardiya tarkibidagi Ixtisoslashtirilgan o‘quv markazi shuningdek, Farg‘ona, Jizzax viloyatlarida hamda Qoraqalpog‘iston Respublikasida joylashgan mintaqaviy o‘quv markazlar faoliyatining mazkur Universitet bilan uzviy bog‘liqligi taʼkidlanib, markazlarning ilmiy salohiyatini takomillashtirish va mutaxassis o‘qituvchilarning ilmiy izlanish olib borishlari uchun sharoit yaratilishi yuzasidan O‘zbekiston Respublikasi Jamoat xavfsizligi universiteti boshlig‘i polkovnik M.Rustambayevga tegishli topshiriqlar berildi.
Shundan so‘ng, Milliy gvardiya qo‘mondoni buyrug‘i bilan ilk marotaba ilmiy salohiyatga ega bo‘lgan bir guruh ofitserlar tarkibiga navbatidan oldin “kapitan”, “mayor” va “podpolkovnik” harbiy unvonlari topshirildi.
Diyorimizda ustozlar ulug‘lanib kelingan. Taʼlim sohasida faoliyat olib borayotgan pedologlarga bugungi kunda ko‘rsatilayotgan eʼtibor va bildirilayotgan imtiyozlar ularning ruhiyati, hamda mehnatiga bo‘lgan munosabatini o‘zgartirish bilan birga yoshlarimizning kelajagi yo‘lida yuksak masʼuliyat yuklaydi.
