Юртбошимиз таъкидлаганидек, Ўзбекистоннинг эртанги кунига ишончни-мустаҳкамлаш, аждодларга муносиб бўлиш учун ислоҳотларни илмдан бошлаш керак. Чунки илмсиз ҳеч бир соҳада натижа бўлмайди.

Кейинги уч йилда бу борадаги муаммоларни самарали ҳал этиш, мамлакатимизда кадрлар тайёрлаш тизимини тубдан такомиллаштириш бўйича кенг кўламли ишлар амалга оширилди. Шу мақсадда қатор Фармон ва қарорлар қабул қилиниб, бу борадаги комплекс саъй-ҳаракатлар учун пухта ҳуқуқий замин яратилди.

Давлатимиз раҳбарининг “Жамоат хавфсизлигини таъминлаш соҳасида профессионал кадрларни тайёрлаш тизимини янада такомиллаштириш чора-тадбирлари тўғрисида” ги қарорига биноан Миллий гвардия Ҳарбий-техник институтининг Жамоат хавфсизлиги университети этиб қайта ташкил этилганлиги олиб борилаётган ислоҳотларнинг мантиқий давомидир.

Мазкур қарорнинг ижроси юзасидан жорий йилнинг 11 май куни Миллий гвардия қўмондони генерал-майор Р.Джураевнинг Ўзбекистон Республикаси Жамоат хавфсизлиги университети профессор-ўқитувчилари билан бўлиб ўтган навбатдаги учрашуви, таркибий ва ҳудудий бўлинмалар мутасадди раҳбарлари иштирокидаги селектор йиғилиши тарзида ўтказилди.

 Йиғилишда мамлакатимизнинг эртанги куни замонавий кадрларга боғлиқ экани таъкидланиб, Университетдаги таълим тизимини тубдан такомиллаштирган ҳолда, ўқув жараёнини замонавий шакл ва услублари, педагогик ва ахборот технологияларини қўллаган ҳолда Қуролли Кучлар ва ҳуқуқни муҳофаза қилувчи органлари учун олий малакали илмий-педагогик кадрларни тайёрлаш, шунингдек жамоат хавфсизлигини таъминлашнинг энг долзарб муаммолари бўйича комплекс илмий тадқиқотлар олиб бориш бўйича профессор-ўқитувчилар олдидаги муҳим вазифалар  белгилаб берилди.

Шу билан бирга Миллий гвардия таркибидаги Ихтисослаштирилган ўқув маркази шунингдек, Фарғона, Жиззах вилоятларида ҳамда Қорақалпоғистон Республикасида жойлашган минтақавий ўқув марказлар фаолиятининг мазкур Университет билан узвий боғлиқлиги таъкидланиб, марказларнинг илмий салоҳиятини такомиллаштириш ва мутахассис ўқитувчиларнинг илмий изланиш олиб боришлари учун шароит яратилиши юзасидан Ўзбекистон Республикаси Жамоат хавфсизлиги университети бошлиғи полковник М.Рустамбаевга тегишли топшириқлар берилди.

Шундан сўнг, Миллий гвардия қўмондони буйруғи билан илк маротаба  илмий салоҳиятга эга бўлган бир гуруҳ офицерлар таркибига навбатидан олдин “капитан”, “майор” ва “подполковник” ҳарбий унвонлари топширилди.

Диёримизда устозлар улуғланиб келинган. Таълим соҳасида фаолият олиб бораётган педологларга бугунги кунда кўрсатилаётган эътибор ва  билдирилаётган имтиёзлар уларнинг руҳияти, ҳамда меҳнатига бўлган муносабатини ўзгартириш билан бирга ёшларимизнинг келажаги йўлида юксак масъулият юклайди.