Yangi yilga bayramona tuhfa. Qashqadaryo viloyatida Ma'naviyat va ma'rifat markazi hamda Yangi binolar foydalanishga topshirildi
Milliy gvardiya Qashqadaryo viloyati bo‘yicha boshqarmasida musiqa sadolari ostida harbiy xizmatchi va xodimlar hamda ularning oila a'zolariga quvonch bag‘ishlovchi tantanali tadbirlar o‘tkazildi.
Milliy gvardiya qo‘mondoni, general-mayor R.Djuraev boshchiligida o‘tkazilgan tantanali tadbirlarda Qashqadaryo viloyati hokimining yoshlar siyosati, ijtimoiy rivojlantirish va ma'naviy-ma'rifiy ishlar bo‘yicha o‘rinbosari A.Qobilov, Respublika Ma'naviyat va ma'rifat markazi Qashqadaryo viloyati bo‘limi boshlig‘i L.Saodatova, viloyat sektor rahbarlari, hamkor tashkilotlar mutasaddi rahbarlari, faxriylar, harbiy xizmatchi va xodimlar, shuningdek ularning oila a'zolari ishtirok etishdi.
Dastlab osoyishta hayotimiz posbonlari bo‘lgan harbiy xizmatchilarimizga yangi qad rostlagan 5 qavatli 30 ta xonadondan iborat zamonaviy xizmat uylarini topshirish marosimi o‘tkazildi.
Marosimda so‘z olganlar o‘z vazifalariga sidqidildan yondashib, sadoqat bilan xizmat qilib kelayotgan bir guruh harbiylarga barcha qulayliklarga ega mazkur xizmat uylarining topshirilishi davlatimiz tomonidan ularga bildirilgan ishonch va e'tirof ekanligini alohida ta'kidlashdi.
Xonadon kalitlari o‘z egalariga topshirilgandan so‘ng, mehmonlar yangi uylarda yaratilgan sharoitlar bilan yaqindan tanishishdi.
Bundan tashqari boshqarma hududida yangi faoliyat boshlagan Chavandozlar maktabi ham tashrif buyurgan mehmonlarda katta qiziqish uyg‘otdi.
Shundan so‘ng, tizimda olib borilayotgan bunyodkorlik ishlarining mantiqiy davomi sifatida yangi qurib bitkazilgan Ma'naviyat va ma'rifat markazi binosining ochilish marosimi o‘tkazildi.
Mazkur markazning 240 o‘ringa mo‘ljallangan anjumanlar zalida o‘tkazilgan tantanali tadbir barchaga bayramona kayfiyat ulashdi.
Milliy gvardiya qo‘mondoni o‘z nutqida ushbu markazdagi elektron kutubxona, o‘quv zallari, muzey, ruhiy yengillashtirish va xizmat xonalari, yoshlar uchun mo‘ljallangan xonalar harbiy xizmatchi va xodimlar, shuningdek, ularning oila a'zolari hamda mahalliy yoshlarning kasbga yo‘naltirish va sport bilan muntazam shug‘ullanishlari, madaniy hordiq chiqarishlari uchun xizmat qilishini alohida ta'kidladi.
Shu bilan birga, Milliy gvardiya qo‘mondoni buyrug‘i bilan jamoat tartibini saqlash, fuqarolar xavfsizligini ta'minlash, jinoyat va huquqbuzarliklarning oldini olish borasida faollik ko‘rsatib, mustaqil Vatanimiz qudrati va salohiyatini yuksaltirishda o‘zining fidokorona xizmatlari bilan munosib hissa qo‘shib kelayotgan harbiy xizmatchi va
xodimlarga, samarali hamkorlik qilib kelayotgan vazirlik va tashkilotlar vakillariga Milliy gvardiyaning I – II darajali "Namunali xizmatlari uchun", "Ma'naviyat a'lochisi" va "Fidoyi xodim" ko‘krak nishonlari, Faxriy yorliqlar va esdalik qo‘l soatlari topshirildi.
Marosim so‘ngida Milliy gvardiya ansambli hamda Qashqadaryo viloyati yosh san'atkorlari tomonidan ijro etilgan go‘zal kuy-qo‘shiqlar, jozibador raqslar barchaga bayramona kayfiyat ulashdi.
