Respublikamiz bo‘ylab pirotexnika vositalari savdosiga qarshi hamkorlikdagi profilaktik tadbirlar davom etmoqda.
ANDIJON VILOYATI.
Andijon shahrida joylashgan "Ice Rink" muz maydoni yaqinida “Qo‘riqlash” bosh boshqarmasi va uning Andijon viloyati bo‘yicha bo‘linmasi xodimlari tomonidan noqonuniy pirotexnika vositalari sotayotgan farg‘onalik 19 yoshli N.A. qo‘lga olindi.
Xolislar ishtirokidagi tekshiruv vaqtida huquqbuzarning yonida 10 dona (har biri 10 o‘ram) “Britanik” va 8 dona “7-Shoots” nomli pirotexnika vositalari mavjudligi aniqlanib, musodara qilindi.
Mazkur holat yuzasidan surishtiruv ishlari olib borilmoqda.
BUXORO VILOYATI.
Buxoro shahri Davlat bojxona qo‘mitasi xodimlari, Milliy gvardiya harbiy xizmatchilari va boshqa huquqni muhofaza qiluvchi idora vakillari tomonidan o‘tkazilgan qo‘shma tadbirlar davomida kuzatuv ostidagi 34 yoshli fuqaro B.J. yuk mashinasiga ortilgan pirotexnika vositalarini 83 ming AQSH dollariga sotishga kelishib, shundan 50 ming AQSH dollarini qabul qilib olayotgan vaqtida qo‘lga olindi. Tekshiruv jarayonida yuk mashinasi ichida 19 turdagi jami 7016 dona “Salyut” borligi aniqlandi.
Mazkur holat bo‘yicha Bojxona boshqarmasi Surishtiruv bo‘limi tomonidan tergovga qadar tekshiruv harakatlari olib borilmoqda.
FARG‘ONA VILOYATI.
Qo‘qon shahrida joylashgan Tibbiyot muassasasi yonida Milliy gvardiya Farg‘ona viloyati bo‘yicha boshqarmasi harbiy xizmatchilari tomonidan noqonuniy “Britanik” nomli pirotexnika vositalarini sotayotgan 17 yoshli qiz qo‘lga olindi. Voqea joyida xodimlar tomonidan huquqbuzarning sumkasi tekshirilganda, uning ichida 5 dona (49 o‘ram) “Britanik” pirotexnika vositalari borligi maʼlum bo‘ldi. Mazkur holat yuzasidan O‘zbekiston Respublikasi Maʼmuriy javobgarlik to‘g‘risidagi kodeksining 185-1-moddasida nazarda tutilgan maʼmuriy huquqbuzarlik to‘g‘risida bayonnoma rasmiylashtirildi.
Hurmatli yurtdoshlar!
Shuni eslatib o‘tamizki, pirotexnika mahsulotlari bilan noqonuniy savdo qilish O‘zbekiston Respublikasi Maʼmuriy javobgarlik to‘g‘risidagi kodeksining 185-1-moddasi bo‘yicha ashyolar musodara qilinib, bazaviy hisoblash miqdorining besh baravaridan yigirma baravarigacha miqdorda jarima solishga sabab bo‘ladi.
Pirotexnika buyumlarini qonunga xilof ravishda ishlab chiqarish, tayyorlash, saqlash, tashish, jo‘natish, ulardan foydalanish, huddi shuningdek, ularni qonunga xilof ravishda O‘zbekiston Respublikasiga olib kirish (O‘zbekiston Respublikasidan olib chiqish) yoki o‘tkazish ancha miqdorda yohud shunday harakatlar maʼmuriy jazo qo‘llanilganidan keyin sodir etilgan bo‘lsa, O‘zbekiston Respublikasi Jinoyat kodeksining 250-1-moddasiga asosan jinoiy javobgarlikka tortiladi.
