Tibbiyot muassasasidan dori mahsulotlarini yashirin ravishda olib chiqishga uringan fuqaro “Qo‘riqlash” xizmati xodimlari tomonidan to‘xtatib qolindi
Joriy yilning 15 iyun kuni soat taxminan 16:50 larda Toshkent shahri Chilonzor tumanida joylashgan Respublika ixtisoslashtirilgan gematologiya ilmiy-amaliy tibbiyot markazida xizmat olib borayotgan “Qo‘riqlash” bo‘limi xodimi tomonidan ushbu tibbiyot markazi dorixonasi mudiri fuqaro A.S. nazorat o‘tkazish punktida tekshirilgan.
Tekshirish jarayonida fuqaro o‘ziga tegishli bo‘lgan sumkada umumiy qiymati 1.350.241 (bir million uch yuz ellik ming ikki yuz qirq bir) so‘mlik 30 dona “Endoksan” nomli dori mahsulotlarini hech qanday hujjatlarsiz, noqonuniy ravishda olib chiqib ketayotganligi aniqlangan.
Mazkur holat yuzasidan O‘zbekiston Respublikasi Maʼmuriy javobgarlik to‘g‘risidagi kodeksining 61-moddasi (Oz miqdorda talon-taroj qilish) bo‘yicha tegishli hujjatlar rasmiylashtirilib, bayonnoma Chilonzor tuman sudiga yuborildi.
