Yetim bolalar va ota-ona qaramogʻidan mahrum boʻlgan bolalarni tarbiyalashning tubdan yangilangan tizimini joriy etish, ularni barkamol avlod sifatida shakllanishi hamda ijtimoiy moslashuvini taʼminlash uchun zarur shart-sharoitlar yaratish, shuningdek, yetim bolalar va ota-ona qaramogʻidan mahrum boʻlgan bolalarni davlat tomonidan qoʻllab-quvvatlash masalalariga hukumatimiz tomonidan alohida eʼtibor qaratilmoqda.
Bugunda mehribonlik uylari tarbiyalanuvchilarining ijtimoiy himoyasi, taʼlim-tarbiya olish ishlariga butkul oʻzgacha tarzda yondashilmoqda. Ularning ichki dunyosini oʻrganish orqali qiziqishlari va intilishlari aniqlanmoqda. Shuni taʼkidlash joizki, Prezidentimiz tomonidan imzolangan “Yetim bolalar va ota-ona qaramogʻidan mahrum boʻlgan bolalarni davlat tomonidan qoʻllab-quvvatlash va ularni tarbiyalashning tubdan yangilangan tizimini joriy etish boʻyicha chora-tadbirlar toʻgʻrisida"gi qarori bilan Mehribonlik uylari va bolalar shaharchalariga 2 ta psixolog shtat birligi ajratiladi. Milliy gvardiya psixolog mutaxassislari tomonidan yetim bolalar va ota-ona qaramogʻidan mahrum boʻlgan bolalarni psixologik-pedagogik qoʻllab-quvvatlash ishlari amalga oshiriladi. Bu ham albatta bolalarning tushkunlikka tushmasdan, kelajaklari uchun ulkan maqsadlar qoʻyib ulgʻayishiga sabab boʻladi. Milliy gvardiya Ixtsosolashtirilgan oʻquv markazida oʻtkazilgan “Mehribonlik uylari tarbiyalanuvchilari bilan olib boriladigan psixologik ishlar samaradorligini yanada oshirish masalalari” mavzusidagi ilmiy-amaliy konferensiya yuqorida taʼkidlab oʻtilgan say-harakatlarni amalga oshirishning metodikalarini yangilash va oʻrganishga bagʻishlandi.
Anjumanda Ichki ishlar vazirligi, SOS-Oʻzbekiston bolalar mahallalari uyushmasi va Milliy gvardiya oliy toifali psixologlari ishtirok etishdi. Maʼruzachilar bolalar bilan ishlashda ularning yosh qatlami, ulgʻayish bosqichlari, temperementlari, ularning xulqidagi ogʻishlarning namoyon boʻlishi sabablari, tarbiyasi ogʻir oʻsmirlar bilan ishlash tartibi boʻyicha ilmiy izlanishlarini bayon qilishdi.
Oʻzaro tajriba almashishga qaratilgan konferensiyada bolalar bilan qanday psixologik treninglarni oʻtkazish kerakligi, ularda yaxshi kayfiyatni xosil qilishda qanday choralar koʻrish lozimligi koʻrgazmali tarzda koʻrsatib berildi. Albatta oʻtkazilgan mazkur tadbirdan olingan koʻnikmalarni psixolog harbiy xizmatchi va xodimlar, mehribonlik uylari tarbiyachilari kelgusida oʻzlari faoliyat yuritadigan oʻquv-tarbiya massasalarida amaliyotda qoʻllashadi.