Respublika miqyosida harbiy xizmatchi va xodimlar ishtirokida tibbiy tayyorgarlik mashg‘uloti tashkil etildi.
Mashg‘ulot avvalida mutaxassislar tomonidan baxtsiz hodisalarni oldini olish, jihozlanmagan suv havzalarida cho‘milishning oqibatlari, poliz, sabzavot va mevalarning ayrim turlarini isteʼmol qilish bilan bog‘liq zaharlanish holatlari, o‘tkir ichak va yuqumli kasalliklarni orttirish xavfi, shaxsiy gigiyena qoidalariga rioya qilmaslik hamda ruhiy-jismoniy zo‘riqish yuzasidan kelib chiqishi mumkin bo‘lgan kasalliklar to‘g‘risida atroflicha maʼlumot berildi.
Shuningdek, jamoat tartibini saqlash faoliyatida yuqoridagi holatlar bilan bog‘liq vaziyatlar yuzaga kelganda, birinchi yordam ko‘rsatishda tezkorlikka alohida ahamiyat berish lozimligi taʼkidlandi.
Tadbirning ikkinchi qismi amaliy mashg‘ulot bo‘lib, unda ishtirokchilar yuzaga kelishi mumkin bo‘lgan hollarda tibbiy yordam ko‘rsatish bo‘yicha bilim va ko‘nikmalarini mustahkamlashdi, shu bilan birga, o‘zlarini qiziqtirgan savollariga batafsil javoblar olishdi.
