SAMARQANDDA “YОSh KITOBXON HARBIY XIZMATCHI” TANLOVI O‘TKAZILDI
“Yangi O‘zbekiston yoshlari, birlashaylik!” shiori ostida o‘tkazilayotgan yoshlar oyligi doirasida O‘zbekiston yoshlar ittifoqi Samarqand viloyat Kengashi tashabbusi bilan O‘zbekiston Respublikasi Qurolli Kuchlari harbiy xizmatchilari o‘rtasida “Yosh kitobxon harbiy xizmatchi” ko‘rik-tanlovi o‘tkazildi.
Mazkur tanlov yosh harbiy xizmatchilar o‘rtasida kitob mutolaasi va kitobxonlik madaniyatini oshirish, buyuk adib va mutafakkirlarimizning nodir merosini o‘rganish, yoshlarni kitob mutolaasiga qiziqtirish hamda maʼnaviy-intellektual salohiyati va dunyoqarashini yana-da yuksaltirish maqsadida tashkil etildi.
Tadbir davomida Markaziy harbiy okrug, DXX Chegara qo‘shinlari, Milliy gvardiya va Ichki ishlar vazirligi aeroportlarda xavfsizlikni taʼminlash qismi harbiy xizmatchilari ishtirok etib, ular 3 ta shart asosida o‘zaro bellashishdi.
Tanlovning viloyat bosqichida ishtirok etish har bir harbiy qismlardan bir nafar, jami 12 nafar harbiy xizmatchiga nasib etdi.
Uch shart natijalariga ko‘ra, Ichki ishlar vazirligi aeroportlarda xavfsizlikni taʼminlash harbiy qismi g‘oliblikni qo‘lga kiritdi. Milliy gvardiyaga qarashli Toyloq tumanida joylashgan harbiy qismning harbiy xizmatchisi faxrli ikkinchi o‘rinni egallagan bo‘lsa, Markaziy harbiy okrugning Nurobod tumanidagi harbiy qismning harbiysi uchinchi o‘ringa loyiq deb topildi.
Tanlov g‘oliblari tashkilotchilar tomonidan diplom va esdalik sovg‘alari bilan taqdirlandi.
