САМАРҚАНДДА “ЁШ КИТОБХОН ҲАРБИЙ ХИЗМАТЧИ” ТАНЛОВИ ЎТКАЗИЛДИ
“Янги Ўзбекистон ёшлари, бирлашайлик!” шиори остида ўтказилаётган ёшлар ойлиги доирасида Ўзбекистон ёшлар иттифоқи Самарқанд вилоят Кенгаши ташаббуси билан Ўзбекистон Республикаси Қуролли Кучлари ҳарбий хизматчилари ўртасида “Ёш китобхон ҳарбий хизматчи” кўрик-танлови ўтказилди.
Мазкур танлов ёш ҳарбий хизматчилар ўртасида китоб мутолааси ва китобхонлик маданиятини ошириш, буюк адиб ва мутафаккирларимизнинг нодир меросини ўрганиш, ёшларни китоб мутолаасига қизиқтириш ҳамда маънавий-интеллектуал салоҳияти ва дунёқарашини янада юксалтириш мақсадида ташкил этилди.
Тадбир давомида Марказий ҳарбий округ, ДХХ Чегара қўшинлари, Миллий гвардия ва Ички ишлар вазирлиги аэропортларда хавфсизликни таъминлаш қисми ҳарбий хизматчилари иштирок этиб, улар 3 та шарт асосида ўзаро беллашишди.
Танловнинг вилоят босқичида иштирок этиш ҳар бир ҳарбий қисмлардан бир нафар, жами 12 нафар ҳарбий хизматчига насиб этди.
Уч шарт натижаларига кўра, Ички ишлар вазирлиги аэропортларда хавфсизликни таъминлаш ҳарбий қисми ғолибликни қўлга киритди. Миллий гвардияга қарашли Тойлоқ туманида жойлашган ҳарбий қисмнинг ҳарбий хизматчиси фахрли иккинчи ўринни эгаллаган бўлса, Марказий ҳарбий округнинг Нуробод туманидаги ҳарбий қисмнинг ҳарбийси учинчи ўринга лойиқ деб топилди.
Танлов ғолиблари ташкилотчилар томонидан диплом ва эсдалик совғалари билан тақдирланди.
