“SANʼAT G‘UNCHALARI” KO‘RIK-TANLOVINING RESPUBLIKA BOSQICHI BO‘LIB O‘TDI
Joriy yilning 27-28 mart kunlari Toshkent shahrida damli va zarbli cholg‘ular ijrochiligi bo‘yicha “Sanʼat g‘unchalari” respublika ko‘rik-tanlovi bo‘lib o‘tdi. Mazkur tanlov O‘zbekiston Bastakorlar uyushmasi va Milliy gvardiya hamkorligida tashkil etilib unda Qoraqalpog‘iston Respublikasi, viloyatlar va Toshkent shahar bosqichida g‘oliblikni qo‘lga kiritgan 166 nafarga yaqin yosh musiqachilar o‘zaro bahslashdi.
Qizg‘in va murosasiz kechgan ushbu tanlov g‘oliblarini taqdirlash marosimi O‘zbekiston davlat konservatoriyasi binosida bo‘lib o‘tdi. Tadbirda mazkur anʼanaviy tanlov iqtidorli bolalarni aniqlash va ularni har tomonlama qo‘llab-quvvatlashda muhim ahamiyat kasb etayotgani taʼkidlandi.
Tanlovda g‘oliblikni qo‘lga kiritib, tajriba orttirgan yosh ijrochilarning aksariyati dunyoning turli mamlakatlarida o‘tkazilgan xalqaro tanlovlarda yuqori yutuqlarga erishgan. Ishtirokchilarning 66 nafari tanlovning sovrinli o‘rinlarini qo‘lga kiritgan bo‘lsa shulardan 37 tasi (Yog‘och damli cholg‘ular 17 ta, Mis damli cholg‘ular 15 ta va Zarbli cholg‘ular 5 ta) Milliy gvardiya Respublika ixtisoslashtirilgan musika litseyi o‘quvchilaridir. Ular tashkilotchilar tomonidan munosib rag‘batlantirilib diplom va qimmatbaho sovg‘alar bilan taqdirlandilar.
