“Sanʼat g‘unchalari” damli va zarbli cholg‘u ijrochilarining XXV – respublika tanlovi g‘oliblari aniqlandi
O‘zbekiston Respublikasi Milliy gvardiyasi, Madaniyat vazirligi, O‘zbekiston kompozitorlari va bastakorlari uyushmasi, “Sog‘lom avlod uchun” xalqaro xayriya fondi hamkorligida “Yoshlar va biznesni qo‘llab-quvvatlash yili” hamda XXV “Sanʼat g‘unchalari” Respublika ko‘rik tanlovi munosabati bilan dastavval “Yangi O‘zbekiston yoshlarini tarbiyalashda musiqa taʼlimining maqsad va vazifalari” mavzusida o‘tkazilayotgan V-Respublika ilmiy-amaliy konferensiyasi bo‘lib o‘tdi. Unda professor o‘qituvchilar, musiqashunos olimlar va musiqa yo‘nalishi mutaxassislari ishtirok etishib, sohadagi dolzarb mavzularda maʼruzalar qilishdi.
Shuni taʼkidlashimiz kerakki, Respublikamizda faoliyat yuritib kelayotgan bolalar musiqa va sanʼat maktablari hamda ixtisoslashtirilgan musiqa akademik litseylari o‘rtasida bo‘lib o‘tgan tanlovda ishtirokchilar o‘zbek va jahon mumtoz kompozitorlari asarlaridan tuzilgan ijro dasturlarini mahorat bilan ijro etishlari Respublikamizda yoshlarga oid davlat siyosatining amaldagi ko‘rinishidir, desak hech mubolag‘a bo‘lmaydi.
1998 yildan muntazam o‘tkazib kelinayotgan ushbu tanlovning bu yilgi hududiy saralash bosqichida 515 nafar o‘quvchilar qatnashgan bo‘lsa, shularda Respublika bosqichida 132 nafari ishtirok etish imkonini qo‘lga kiritdi. Kichik guruh (11-13 yosh) va katta guruh (14-15 yosh) ishtirokchilar o‘rtasida o‘tkazilgan ushbu tanlov yog‘och-damli, mis-damli va zarbli cholg‘ular yo‘nalishlarida olib borildi. Ishtirokchilarning ijodiy ijro mahoratini har bir yo‘nalish bo‘yicha nufuzli oliy darajadagi hakamlar hayʼati oqilona baholab borishdi.
Tanlovning tantanali yopilish va taqdirlash marosimi O‘zbekiston Respublikasi Milliy gvardiyasi Maʼnaviyat va maʼrifat markazida bo‘lib o‘tdi. Marosimda 69 nafar ishtirokchilar birinchi, ikkinchi, uchinchi o‘rin g‘oliblari bo‘lganliklari eʼlon qilindi.
Bayramona konsertning yorqin dasturida O‘zbekiston Respublikasi Milliy gvardiyasi qo‘mondonining o‘rinbosari S.D.Mamayusupov va O‘zbekiston bastakorlari va kompozitorlari uyushmasi raisi R.Abdullayevlar g‘olib ishtirokchilarni diplom, estalik statuetkalari hamda “Sog‘lom avlod” xalqaro xayriya fondi tomonidan estalik sovg‘alar bilan taqdirladilar.
Damli va zarbli cholg‘u ijrochilarining “Sanʼat g‘unchalari” XXV Respublika tanlovning yopilish marosimiga bag‘ishlangan konsert dasturida Respublika va xalqaro tanlovlar laureatlari va Harbiy musiqa akademik litseyining damli va zarbli cholg‘ular orkestri tomonidan qo‘shiqlar va o‘zbek kuylariga “Poppuri” va boshqa musiqiy nomerlar ijro etildi. Konsert so‘ngida “Yamaha” kompaniyasi tomonidan yosh musiqa ijrochilariga qimmatbaho cholg‘u instrumentlari taqdim etildi.
