SAYYOR QABULLAR FARG‘ONA VILOYATIDA
Bugungi kunda inson manfaatlarini taʼminlash, xalq bilan ochiq muloqot qilish, ularning orzu-niyatlari va hayotiy muammolarini bartaraf etishga katta eʼtibor berilmoqda. Ushbu maqsadda joriy yilning 9 mart kuni Farg‘ona viloyatida Milliy gvardiya tizimida xizmat qilib kelayotgan harbiy xizmatchi va xodimlar hamda ularning oila aʼzolari bilan sayyor qabul tashkillashtirildi.
Mazkur uchrashuvda viloyat hokimligi, Milliy gvardiya qo‘mondonligi, viloyat harbiy prokuraturasi, Mahalla va oilani qo‘llab-quvvatlash, Xalq taʼlimi, Maktabgacha taʼlim boshqarmalari, Bandlikka ko‘maklashish markazi mutassadi rahbarlari hamda mahalla faollari ishtirok etdilar.
Yig‘ilish ishtirokchilariga dastlab mamlakatimizda huquqni muhofaza qilish organlari faoliyatiga doir amalga oshirilayotgan islohotlar, xodimlar va ularning oila aʼzolari uchun yaratilayotgan shart-sharoitlar va imkoniyatlar xususida so‘z yuritildi.
Shundan so‘ng, ochiq muloqot tarzida davom etgan ushbu uchrashuvda har bir ishtirokchining murojaati, takliflari tinglandi. Bu jarayonda fuqarolar tomonidan uy-joy bilan taʼminlash, bandlik masalalari, imtiyozli kredit olish hamda boshqa ijtimoiy muammolar o‘rtaga tashlandi. Har bir murojaat yuzasidan atroflicha yechim izlanib, tegishli huquqiy maslahatlar berildi. Barcha masalalarning yechimi yuzasidan mutasaddi rahbarlarga topshiriqlar berildi.
