«Shaxmat kunlari» musobaqasi g‘oliblari aniqlandi
Jismoniy tarbiya va sport vazirligi tomonidan O‘zbekiston shaxmat federatsiyasi bilan hamkorlikda kuni kecha poytaxtimizdagi Xalqaro shaxmat akademiyasida «Shaxmat kunlari» musobaqasi o‘tkazildi.
Vazirlik, idora, korxona va tashkilotlar xodimlari o‘rtasida shaxmatni keng targ‘ib qilish va ushbu sport turini aholi o‘rtasida ommaviylashtirish maqsadida tashkil etilgan mazkur musobaqada ishtirokchilar shaxmatning rapid yo‘nalishida o‘zaro raqobatlashdi.
Qizg‘in va murosasiz o‘tgan bahslarda O‘zatom agentligi xodimi Alisher Sanetullayev 7 ochko to‘plagan holda birinchi o‘rinni qo‘lga kiritdi. Ikkinchi o‘ringa Milliy gvardiya harbiy xizmatchisi Izzatulla Sultanov 6,5 ochko bilan egalik qilgan bo‘lsa, OKMK xodimi Andrey Tyumensev 6 ochko to‘plagan holda uchinchi pog‘onadan o‘rin egalladi.
Shuningdek, Milliy gvardiya Toshkent shahri bo‘yicha boshqarmasi ayol harbiy xizmatchisi Nozima Djalolova “Eng tajribali ishtirokchi” nominatsiyasida g‘oliblikni qo‘lga kiritdi.
Musobaqa so‘ngida g‘olib va sovrindorlar medal, diplom va esdalik sovg‘alari bilan taqdirlandi.
