SHAXMAT BO‘YICHA XXX SPARTAKIADA MUSOBAQASI O‘TKAZILDI
Joriy yilning 19-20 avgust kunlari poytaxtimizdagi O‘zbekiston Respublikasi Shaxmat federatsiyasi bazasida huquqni muhofaza qiluvchi organ hodimlari o‘rtasida XXX Spartakiada dasturiga kiritilgan shaxmat musobaqasi bo‘lib o‘tdi. Musobaqa karantin qoidalariga to‘la amal qilingan holda o‘tkazilib, unda 12 ta jamoa hamda 50 ta ishtirokchilar o‘zaro bellashishdi.
Harbiy xizmatchi va hodimlar o‘rtasida sog‘lom turmush tarzini keng targ‘ib qilish va ushbu sport turini yana-da ommaviylashtirish maqsadida tashkil etilgan mazkur bellashuvda Milliy gvardiya harbiy xizmatchisi Izzatulla Sultanov faxrli birinchi o‘rinni qo‘lga kiritdi. Ikkinchi o‘ringa O‘zbekiston Respublikasi Davlat bojxona qo‘mitasi xodimi Boymurodov Bahodir egalik qilgan bo‘lsa, Davlat xavfsizlik xizmati xodimasi Mamatqulova Maftuna uchinchi pog‘onadan o‘rin egalladi.
Shuningdek, bahslar umumjamoa hisobida 1-o‘rinni O‘zbekiston Respublikasi Davlat xavfsizlik xizmati jamoasi, 2-o‘rinni Davlat bojxona qo‘mitasi jamoasi, 3-o‘rinni Milliy gvardiyasi jamoasi egalladi.
Musobaqa so‘ngida g‘olib va sovrindorlar medal, diplom va esdalik sovg‘alari bilan taqdirlandi.
