SHOFIRKON TUMANIDA 400 GA YAQIN O‘QUVCHI YoSHLARNI BIRLASHTIRGAN VATANPARVARLIK TADBIRI
Ayni kunlarda dunyo shiddat bilan o‘zgarayotgan, mintaqalar hamda davlatlar o‘rtasida siyosiy, iqtisodiy va mafkuraviy kurashlar tobora keskinlashayotgan bir sharoitda, mamlakatimiz yoshlarini ona Vatanga muhabbat, milliy istiqlol g‘oyalariga sadoqat ruhida tarbiyalash barchamiz uchun dolzarb ahamiyat kasb etayotgan muhim vazifalardan biridir.
Shu bois, "Yoshlarni qo‘llab-quvvatlash va aholi salomatligini mustahkalash" yilida yurt taqdiri uchun befarq bo‘lmagan har bir yoshda masʼuliyat tuyg‘ularini mustahkamlash, ularni har tomonlama yetuk kadrlar etib tarbiyalash borasida aniq manzilli rejalar ishlab chiqilib, taʼlim muassasalari, mehnat jamoalari va mahallalardagi uyushgan va uyushmagan yoshlar bilan harbiy-vatanparvarlik yo‘nalishidagi tadbirlar tizimli tashkil etilmoqda. Xususan, kuni kecha Shofirkon tumanida bo‘lib o‘tgan tadbir ham ana shu maqsadlarning uzviy davomi bo‘ldi.
Tadbirda harbiy xizmatchilar tomonidan tayyorlangan vatanparvarlik g‘oyasini targ‘ib etuvchi ko‘rgazmali chiqishlar barchaga manzur bo‘ldi. Ayniqsa, o‘quvchi-yoshlarning sport hamda sanʼat sohalaridagi chiqishlari maroq va hayrat bilan tomosha qilindi.
Tadbir davomida, Milliy gvardiya Buxoro viloyati bo‘yicha boshqarmasi, viloyat IIBning tarkibiy tuzilmalari hamda Buxoro garnizoni harbiy orkestrining ko‘rgazmali chiqishlari namoyish etilib, olqishlarga sazovor bo‘ldi.
Taʼkidlash joizki, mamlakatimizning barcha sohalari uchun vatanparvar, o‘z kasbiga sadoqatli va har tomonlama yetuk kadrlarni shakllantirishni ko‘zda tutuvchi bu kabi tadbirlar yoshlarning xotirasida uzoq vaqtgacha muhrlanib qolishi va ularda shu yurtga daxldorlik tuyg‘usini mustahkamlashi, shubhasiz. O‘ylaymizki, mazkur tadbirdagi Vatanni madh etuvchi kuy-qo‘shiqlar hamda bir-biridan qiziqarli chiqishlar ertamiz egalarining keyingi qadamlarida o‘zining ijobiy taʼsirini ko‘rsatmay qolmaydi.
