Айни кунларда дунё шиддат билан ўзгараётган, минтақалар ҳамда давлатлар ўртасида сиёсий, иқтисодий ва мафкуравий курашлар тобора кескинлашаётган бир шароитда, мамлакатимиз ёшларини она Ватанга муҳаббат, миллий истиқлол ғояларига садоқат руҳида тарбиялаш барчамиз учун долзарб аҳамият касб этаётган муҳим вазифалардан биридир.
Шу боис, "Ёшларни қўллаб-қувватлаш ва аҳоли саломатлигини мустаҳкалаш" йилида юрт тақдири учун бефарқ бўлмаган ҳар бир ёшда масъулият туйғуларини мустаҳкамлаш, уларни ҳар томонлама етук кадрлар этиб тарбиялаш борасида аниқ манзилли режалар ишлаб чиқилиб, таълим муассасалари, меҳнат жамоалари ва маҳаллалардаги уюшган ва уюшмаган ёшлар билан ҳарбий-ватанпарварлик йўналишидаги тадбирлар тизимли ташкил этилмоқда. Хусусан, куни кеча Шофиркон туманида бўлиб ўтган тадбир ҳам ана шу мақсадларнинг узвий давоми бўлди.
Тадбирда ҳарбий хизматчилар томонидан тайёрланган ватанпарварлик ғоясини тарғиб этувчи кўргазмали чиқишлар барчага манзур бўлди. Айниқса, ўқувчи-ёшларнинг спорт ҳамда санъат соҳаларидаги чиқишлари мароқ ва ҳайрат билан томоша қилинди.
Тадбир давомида, Миллий гвардия Бухоро вилояти бўйича бошқармаси, вилоят ИИБнинг таркибий тузилмалари ҳамда Бухоро гарнизони ҳарбий оркестрининг кўргазмали чиқишлари намойиш этилиб, олқишларга сазовор бўлди.
Таъкидлаш жоизки, мамлакатимизнинг барча соҳалари учун ватанпарвар, ўз касбига садоқатли ва ҳар томонлама етук кадрларни шакллантиришни кўзда тутувчи бу каби тадбирлар ёшларнинг хотирасида узоқ вақтгача муҳрланиб қолиши ва уларда шу юртга дахлдорлик туйғусини мустаҳкамлаши, шубҳасиз. Ўйлаймизки, мазкур тадбирдаги Ватанни мадҳ этувчи куй-қўшиқлар ҳамда бир-биридан қизиқарли чиқишлар эртамиз эгаларининг кейинги қадамларида ўзининг ижобий таъсирини кўрсатмай қолмайди.