Milliy gvardiya qo‘mondoni raisligida kengaytirilgan yig‘ilish bo‘lib o‘tdi.
Joriy yilning 17 noyabr kuni O‘zbekiston Respublikasi Milliy gvardiyasi qo‘mondoni raisligida kengaytirilgan yig‘ilish bo‘lib o‘tdi.
Yig‘ilishda birinchi masala bo‘yicha Milliy gvardiya bo‘linmalarida jangovar va maxsus tayyorgarlik yo‘nalishida o‘tkazilayotgan mashg‘ulotlarning sifati muhokama qilinib, shaxsiy tarkibning jangovar qobiliyatini yana-da oshirish, o‘rganib kelinayotgan xorijiy tajribalarni bo‘linmalarda keng tatbiq etib borish yuzasidan zarur chora-tadbirlar belgilandi.
Ikkinchi masala fuqarolarning murojaatlari bilan ishlashga doir bo‘lib, unda Milliy gvardiya organlariga kelib tushayotgan murojaatlarni o‘z vaqtida, har tomonlama va xolisona ko‘rib chiqilishini taʼminlash, bu borada joylardagi rahbarlarning masʼuliyatini oshirish bo‘yicha topshiriqlar berildi.
Kun tartibiga qo‘yilgan keyingi masalada, yetim va ota-ona qaramog‘idan maxrum bo‘lgan bolalarning taʼlim olish jarayonini nazorat qilish, oilalarga berilgan bolalarning moslashuviga ko‘maklashish, ularni mustaqil xayotga tayyorlash, mehribonlik muassasalaridan chiqarilganlarni uy-joy bilan taʼminlash hamda har tomonlama ijtimoiy qo‘llab-quvvatlash ishlari ko‘rib chiqildi.
Shu bilan bir qatorda, Jamoat xavfsizligi universitetida bolalarni farzandlikka, vasiylik va patronatga olayotgan tutingan ota-onalarni o‘qitish va tayyorlash uchun tashkil etilgan kafedra professor-o‘qituvchilari tomonidan joylarga chiqib, bolalarning yangi oilaga moslashuvini o‘rganib borish hamda ularga psixologik yordam ko‘rsatish ishlarini yana-da takomillashtirish yuzasidan zarur chora-tadbirlar belgilandi.
Yig‘ilish so‘ngida masʼul rahbarlarga yil yakuniga qadar kun tartibida ko‘rib chiqilgan masalalar yuzasidan amalga oshirilishi lozim bo‘lgan ishlar bo‘yicha topshiriqlar berildi.
