YОSHLAR SPORT BILAN HAMNAFAS
Milliy gvardiya harbiy xizmatchilari tashabbusi bilan poytaxtimizdagi 22-sonli Mehribonlik uyida muassasa tarbiyalanuvchilari uchun madaniy-maʼrifiy, ko‘ngilochar va sport tadbirlari o‘tkazildi.
Dastavval harbiylar tomonidan ishtirokchilarga o‘yin shartlari va baholash tartibi tushuntirilib, estafetaga start berildi. Musobaqa shartlariga ko‘ra, ishtirokchilar 100 metr masofaga yugurib avtomatni noto‘liq qismlarga ajratish va yig‘ish hamda sportning turnikda tortilish, stol tennisi, shaxmat-shashka, arqon tortish turlari bo‘yicha bellashdi.
Olti nafar o‘g‘il bolalardan tashkil topgan jamoalarning ishtirokchilari bahslar davomida astoydil g‘alaba sari intilishdi. Musobaqa yakunida ko‘rsatgichlari teng bo‘lib qolgan jamoalar o‘rtasidagi g‘oliblar, qo‘shimcha sinov tariqasida berilgan kuch mashqlarini bajarish orqali aniqlandi.
Sport tadbirida qatnashgan barcha yoshlarga Milliy gvardiya qo‘mondonligi tomonidan sovg‘a tariqasida maxsus harbiy kiyim-boshlar taqdim etilib, munosib rag‘batlantirildi.
Shuningdek, tadbir so‘ngida muddatli harbiy xizmatchilar tomonidan tayyorlangan qo‘l jangi usullari va saf chiqishlari ishtirokchilarga ko‘tarinki kayfiyat bag‘ishladi.
Tarbiyalanuvchilar o‘rtasida tashkil etilgan harbiy-sport musobaqalari yoshlarni vatanparvarlik ruhida tarbiyalash, ularning bo‘sh vaqtlarini mazmunli o‘tkazishlarini taʼminlash, shuningdek, sportga bo‘lgan qiziqishini yana-da orttirish maqsadlarini o‘zida mujassamlashtirgan.
