SPORTNING VOLEYBOL TURI BO‘YICHA MILLIY GVARDIYA BIRINCHILIGI UCHUN HUDUDIY SARALASH MUSOBAQALARI YAKUNLANDI.
Sportning voleybol turi boʻyicha Oʻzbekiston Respublikasi Milliy gvardiyasi birinchiligi uchun 25-26 yanvar kunlari hududiy saralash musobaqalari boʻlib oʻtdi. Jamoalar 6 ta guruhga boʻlingan holda gʻoliblik uchun oʻzaro bellashishdi. Har bir guruhda 4 tadan jamoa ishtirok etishib, oʻzaro kuch sinashishdi. A va B-guruhi jamoalari oʻrtasidagi voleybol oʻyinlari Toshkent viloyati Chirchiq shahridagi Oʻzbekiston Davlat Jismoniy tarbiya va sport universiteti voleybol maydonida boʻlib oʻtdi. Unda A-guruhidan Milliy gvardiya alohida vazifalarni bajaruvchi brigadasi gʻolib boʻlgan boʻlsa, B guruhida Chirchiq shahrida joylashgan harbiy qism voleybol sporti ustalarining qoʻli baland keldi. V-guruhidagi bahslar Milliy gvardiya Fargʻona viloyati boʻyicha boshqarmasi sport maydonida oʻtkazildi. Barcha uchrashuvlarda gʻolib boʻlgan Milliy gvardiya Fargʻona viloyati boʻyicha boshqarmasi musobaqaning finaliga yoʻllanmasini qoʻlga kiritdi. G-guruhidagi oʻyinlar ham murosasiz bellashuvga boy boʻldi. Qarshi Olimpiya zaxiralari kolleji voleybol maydonida boʻlib oʻtgan saralash oʻyinlarida Milliy gvardiya Navoiy viloyati boʻyicha boshqarmasi gʻolib boʻlishdi. Shuningdek, Milliy gvardiya Qoraqalpogʻiston Respublikasi va Sirdaryo viloyati boʻyicha boshqarmalari D va YE guruhlarida gʻolib deb topildi.
Hududiy saralash bosqichlarida oʻz guruhlarida birinchi oʻrinni egallagan 6 ta jamoa 28-29 yanvar kunlari Toshkent viloyati Chirchiq shahridagi Oʻzbekiston Davlat Jismoniy tarbiya va sport universiteti voleybol maydonida gʻoliblik uchun musobaqalarga kirishishadi. Mazkur sport turnirini oʻtkazishdan koʻzlangan maqsad shundan iboratki, birinchilik yakuni boʻyicha voleybol sport turida Oliy liga bahslarida ishtirok etadigan Milliy gvardiya terma jamoasini shakllantirish va yoshlar oʻrtasida ushbu sport turini keng targʻib qilish koʻzda tutilgan.
