Спортнинг волейбол тури бўйича Ўзбекистон Республикаси Миллий гвардияси биринчилиги учун 25-26 январь кунлари ҳудудий саралаш мусобақалари бўлиб ўтди. Жамоалар 6 та гуруҳга бўлинган ҳолда ғолиблик учун ўзаро беллашишди. Ҳар бир гуруҳда 4 тадан жамоа иштирок этишиб, ўзаро куч синашишди. А ва Б-гуруҳи жамоалари ўртасидаги волейбол ўйинлари Тошкент вилояти Чирчиқ шаҳридаги Ўзбекистон Давлат Жисмоний тарбия ва спорт университети волейбол майдонида бўлиб ўтди. Унда А-гуруҳидан Миллий гвардия алоҳида вазифаларни бажарувчи бригадаси ғолиб бўлган бўлса, Б гуруҳида Чирчиқ шаҳрида жойлашган ҳарбий қисм волейбол спорти усталарининг қўли баланд келди. В-гуруҳидаги баҳслар Миллий гвардия Фарғона вилояти бўйича бошқармаси спорт майдонида ўтказилди. Барча учрашувларда ғолиб бўлган Миллий гвардия Фарғона вилояти бўйича бошқармаси мусобақанинг финалига йўлланмасини қўлга киритди. Г-гуруҳидаги ўйинлар ҳам муросасиз беллашувга бой бўлди. Қарши Олимпия захиралари коллежи волейбол майдонида бўлиб ўтган саралаш ўйинларида Миллий гвардия Навоий вилояти бўйича бошқармаси ғолиб бўлишди. Шунингдек, Миллий гвардия Қорақалпоғистон Республикаси ва Сирдарё вилояти бўйича бошқармалари Д ва Е гуруҳларида ғолиб деб топилди.
Ҳудудий саралаш босқичларида ўз гуруҳларида биринчи ўринни эгаллаган 6 та жамоа 28-29 январь кунлари Тошкент вилояти Чирчиқ шаҳридаги Ўзбекистон Давлат Жисмоний тарбия ва спорт университети волейбол майдонида ғолиблик учун мусобақаларга киришишади. Мазкур спорт турнирини ўтказишдан кўзланган мақсад шундан иборатки, биринчилик якуни бўйича волейбол спорт турида Олий лига баҳсларида иштирок этадиган Миллий гвардия терма жамоасини шакллантириш ва ёшлар ўртасида ушбу спорт турини кенг тарғиб қилиш кўзда тутилган.