Sud-huquq sohasidagi masalalar muhokama qilindi
2021 yil 24 avgust kuni Oliy Majlis Senati Sud-huquq masalalari va korrupsiyaga qarshi kurashish qo‘mitasining majlisi bo‘lib o‘tdi. Unda Senat aʼzolari, Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlari doimiy komissiyalari raislari, qo‘mita huzuridagi ekspertlar guruhi aʼzolari, mutasaddi vazirlik va idoralar hamda ommaviy axborot vositalari vakillari ishtirok etdi.
Majlisda Senatning o‘n sakkizinchi yalpi majlisida muhokama qilinishi nazarda tutilgan 6 ta masala (shundan 3 tasi qonun) ko‘rib chiqildi. Xususan, “O‘zbekiston Respublikasi Sudyalar oliy kengashi to‘g‘risida”gi Qonunga kiritilayotgan o‘zgartirishlarda bo‘sh sudyalik lavozimlariga nomzodlarning tanlov jarayonlarini internet tarmog‘i (shu jumladan, veb-sayt) orqali yoritib borishni yo‘lga qo‘yish, sudya faoliyatining samaradorligini elektron reyting orqali ochiq va shaffof baholashni taʼminlaydigan aniq mezonlarni ishlab chiqish va amaliyotga tatbiq etish nazarda tutilmoqda.
Qonunda sudyalar oliy kengashi aʼzolari qatoridan huquqni muhofaza qiluvchi organlari vakillari chiqarib tashlanmoqda.
Shu bilan birga, Senat aʼzolari tomonidan sud tizimida “Ye-XSUD” axborot tizimi joriy etilgan bo‘lsada, qonun va qonun osti hujjatlarini yana-da tartibga solish, ularda jismoniy va yuridik shaxslarning murojaatlari bilan ishlash tizimini yangicha tashkil qilish yuzasidan 5 ta kodeksga, yaʼni Jinoyat-protsessual, Fuqarolik protsessual, Iqtisodiy protsessual, Maʼmuriy javobgarlik to‘g‘risidagi hamda Maʼmuriy sud ishlarini yuritish to‘g‘risidagi kodekslariga bir qator o‘zgarishlar va qo‘shimchalar kiritish muhokama etildi.
Unda sudga murojaat qiluvchi fuqarolarga qulayliklar yaratilib, kassatsiya shikoyatiga (protestiga) ish yuzasidan qabul qilingan sud hujjatlarining sud tomonidan tasdiqlangan ko‘chirma nusxalari ilova qilinishi lozim degan qoida chiqarilib tashlanmoqda. Bu o‘z navbatida sudlardagi byurokratik to‘siqlarni bartaraf etishga xizmat qilib, fuqarolarning odil sudlovga erishish darajasini oshiradi.
Senatorlar tomonidan “O‘zbekiston Respublikasining ayrim qonun hujjatlariga o‘zgartishlar kiritish to‘g‘risida”gi O‘zbekiston Respublikasi Qonuni to‘g‘risida atroflicha muhokama qilindi.
Eʼtiborlisi, O‘zbekiston Respublikasi hududida joylashgan texnik vositalarda hamda shaxsga doir maʼlumotlar bazalarining davlat reyestrida belgilangan tartibda ro‘yxatdan o‘tkazilgan maʼlumotlar bazalarida shaxsiga doir maʼlumotlarni qonunga xilof ravishda olish, qayta ishlash, saqlash, tarqatishga oid talablarga rioya etmaslik uchun maʼmuriy va jinoiy javobgarlik belgilanayotganligi qayd etib o‘tildi.
undan tashqari, Bosh prokuratura huzuridagi Majburiy ijro byurosi tomonidan sud va boshqa organlari hujjatlarining ijrosi o‘z vaqtida taʼminlash holati, huquqni qo‘llash masalalari, shuningdek, O‘zbekiston Respublikasi Oliy sudining sudyasi lavozimiga saylash, O‘zbekiston Respublikasi Prezidentining “Respublikada o‘simliklar karantini va himoyasi tizimini tubdan takomillashtirish chora-tadbirlari to‘g‘risida”gi Farmonini tasdiqlash yuzasidan Senat qaror loyihasi ko‘rib chiqildi.
Majlisda muhokama qilingan masalalar yuzasidan qo‘mitaning tegishli qarorlari qabul qilindi.
