Суд-ҳуқуқ соҳасидаги масалалар муҳокама қилинди
021 йил 24 август куни Олий Мажлис Сенати Суд-ҳуқуқ масалалари ва коррупцияга қарши курашиш қўмитасининг мажлиси бўлиб ўтди. Унда Сенат аъзолари, Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашлари доимий комиссиялари раислари, қўмита ҳузуридаги экспертлар гуруҳи аъзолари, мутасадди вазирлик ва идоралар ҳамда оммавий ахборот воситалари вакиллари иштирок этди.
Мажлисда Сенатнинг ўн саккизинчи ялпи мажлисида муҳокама қилиниши назарда тутилган 6 та масала (шундан 3 таси қонун) кўриб чиқилди. Хусусан, “Ўзбекистон Республикаси Судьялар олий кенгаши тўғрисида”ги Қонунга киритилаётган ўзгартиришларда бўш судьялик лавозимларига номзодларнинг танлов жараёнларини интернет тармоғи (шу жумладан, веб-сайт) орқали ёритиб боришни йўлга қўйиш, судья фаолиятининг самарадорлигини электрон рейтинг орқали очиқ ва шаффоф баҳолашни таъминлайдиган аниқ мезонларни ишлаб чиқиш ва амалиётга татбиқ этиш назарда тутилмоқда.
Қонунда судьялар олий кенгаши аъзолари қаторидан ҳуқуқни муҳофаза қилувчи органлари вакиллари чиқариб ташланмоқда.
Шу билан бирга, Сенат аъзолари томонидан суд тизимида “Е-ХSUD” ахборот тизими жорий этилган бўлсада, қонун ва қонун ости ҳужжатларини янада тартибга солиш, уларда жисмоний ва юридик шахсларнинг мурожаатлари билан ишлаш тизимини янгича ташкил қилиш юзасидан 5 та кодексга, яъни Жиноят-процессуал, Фуқаролик процессуал, Иқтисодий процессуал, Маъмурий жавобгарлик тўғрисидаги ҳамда Маъмурий суд ишларини юритиш тўғрисидаги кодексларига бир қатор ўзгаришлар ва қўшимчалар киритиш муҳокама этилди.
Унда судга мурожаат қилувчи фуқароларга қулайликлар яратилиб, кассация шикоятига (протестига) иш юзасидан қабул қилинган суд ҳужжатларининг суд томонидан тасдиқланган кўчирма нусхалари илова қилиниши лозим деган қоида чиқарилиб ташланмоқда. Бу ўз навбатида судлардаги бюрократик тўсиқларни бартараф этишга хизмат қилиб, фуқароларнинг одил судловга эришиш даражасини оширади.
Сенаторлар томонидан “Ўзбекистон Республикасининг айрим қонун ҳужжатларига ўзгартишлар киритиш тўғрисида”ги Ўзбекистон Республикаси Қонуни тўғрисида атрофлича муҳокама қилинди.
Эътиборлиси, Ўзбекистон Республикаси ҳудудида жойлашган техник воситаларда ҳамда шахсга доир маълумотлар базаларининг давлат реестрида белгиланган тартибда рўйхатдан ўтказилган маълумотлар базаларида шахсига доир маълумотларни қонунга хилоф равишда олиш, қайта ишлаш, сақлаш, тарқатишга оид талабларга риоя этмаслик учун маъмурий ва жиноий жавобгарлик белгиланаётганлиги қайд этиб ўтилди.
ундан ташқари, Бош прокуратура ҳузуридаги Мажбурий ижро бюроси томонидан суд ва бошқа органлари ҳужжатларининг ижроси ўз вақтида таъминлаш ҳолати, ҳуқуқни қўллаш масалалари, шунингдек, Ўзбекистон Республикаси Олий судининг судьяси лавозимига сайлаш, Ўзбекистон Республикаси Президентининг “Республикада ўсимликлар карантини ва ҳимояси тизимини тубдан такомиллаштириш чора-тадбирлари тўғрисида”ги Фармонини тасдиқлаш юзасидан Сенат қарор лойиҳаси кўриб чиқилди.
Мажлисда муҳокама қилинган масалалар юзасидан қўмитанинг тегишли қарорлари қабул қилинди.
