Kuni kecha Termiz shahridagi Amusohil maskanida viloyatdagi uyushmagan yoshlar o‘rtasida sportning “triatlon” turi bo‘yicha Milliy gvardiya Surxondaryo viloyati bo‘yicha boshqarmasi boshlig‘i kubogi uchun birinchilik musobaqasi bo‘lib o‘tdi.

Unda shahar va tumanlarda Qo‘riqlash bo‘limlari tomonidan mahallalar kesimida o‘tkazilgan saralash bosqichlarida ustunlikni qo‘lga kiritgan, 4 nafar yoshlardan iborat 14 ta jamoalar g‘oliblik uchun bellashdilar.

Musobaqa avvalida so‘z olganlar, yurtimizda “triatlon” sport turini rivojlantirish va uni keng aholi o‘rtasida ommalashtirishga qaratilayotgan chora-tadbirlar xususida to‘xtalib, barcha sportchilarga muvaffaqiyatlar tiladilar.

Shundan so‘ng, qizg‘in bellashuvlarga start berilib, ishtirokchilar unda jamoaviy bo‘lgan holda belgilangan vaqtda, 100 metr masofani suvda suzib, 10 kilometrni velosiped haydab hamda 5 kilometr masofani yugurib o‘tdilar.

Qizg‘in va murosasiz bahslarga boy bo‘lgan uchrashuvda yoshlar naqadar jismonan chidamli hamda tezkor ekanliklarini namoyon etishdi. Sportchilarning barcha harakatlari, qobiliyatlari malakali hakamlar tomonidan baholab borildi. Hamjihatlikda va jamoaviy tarzda harakatlangan ishtirokchilar barcha shartlarda ustunlikka ega bo‘ldilar.

Musobaqada umumjamoa hisobida Sariosiyo tumani yoshlari jamoasi 1-o‘rinni egallab, Milliy gvardiya boshlig‘i kubogini qo‘lga kiritdilar. 2-o‘rinni Termiz shahri jamoasi olgan bo‘lsa, 3-o‘rin Jarqo‘rg‘on tumani yoshlariga nasib etdi.

G‘olib bo‘lgan jamoalarga tashkilotchilar tomonidan kubok, diplom hamda sakkiz, olti va to‘rt million so‘mdan pul mukofoti berildi. Shuningdek, "Eng faol ishtirok etgan jamoa" nominatsiyasi bo‘yicha ham, Denov va Qumqo‘rg‘on tumanlari yoshlariga bir million so‘mdan pul mukofoti taqdim etildi.

Yakunda barcha ishtirokchilar uchun bayramona dasturxon yozilib, ko‘tarinki kayfiyat ulashildi.