Bugun Milliy gvardiya markaziy devonida bo‘lib o‘tgan video-selektor tarzidagi kengaytirilgan yig‘ilishda, tizimdagi shaxsiy tarkib o‘rtasida harbiy intizom holati, huquqbuzarliklarni oldini olish hamda yo‘l qo‘yilgan kamchiliklarni o‘z vaqtida bartaraf etish chora-tadbirlari muhokama qilindi.

Qo‘mondon o‘rinbosari polkovnik S.Mamayusupov raisligida o‘tkazilgan mazkur yig‘ilishda O‘zbekiston Respublikasi Harbiy sudi sudyasi O. Jumayev, Harbiy prokurorning birinchi o‘rinbosari adliya polkovnigi O. Xolboyev hamda Davlat xavfsizlik xizmati masʼullari, Milliy gvardiya tarkibiy va hududiy bo‘linma mutasaddi rahbarlari hamda soha vakillari shuningdek, viloyatlardagi harbiy prokurorlar ishtirok etishdi.

Tadbir kun tartibiga kiritilgan masalalar, xususan 2023 yilning birinchi yarim yilligi davomida shaxsiy tarkib o‘rtasidagi harbiy  intizom holati, huquqbuzarliklar sabablari bu borada amalga oshirilgan ishlar, mavjud kamchiliklar  hamda  erishilgan yutuqlar, shuningdek harbiy xizmatchi va xodimlarning sog‘ligi bilan bog‘liq muammolar va ularning yechimlari muhokama qilindi. Unda ushbu yo‘nalishlarga masʼul boshqarma boshliqlari polkovnik T. Qodirov, tibbiyot polkovnigi U. Yusupov hamda  bo‘lim boshlig‘i podpolkovnik M. Xalilovlarning axboroti tinglandi.

Shu bilan birga yuqorida  qayd etilgan mehmonlar yaʼni huquqni muhofaza qiluvchi organ mutasaddilari ham  so‘zga chiqib, shaxsiy tarkib bilan bog‘liq nojo‘ya xatti-harakatlarga to‘xtalgan holda harbiy xizmatchi va xodimlarni kasb madaniyatiga rioya qilishlari, korrupsiya va taʼmagirlik illatlaridan saqlanishlari, shaxsiy va xizmat avtomobillarini boshqarishda yo‘l harakati qoidalariga qatʼiy rioya etishlari yuzasidan zarur tavsiyalar berdilar.

Shu qatorda bugungi kunda yurtimiz aholisining Milliy gvardiyaga bo‘lgan ishonchi va  hukumatimiz tomonidan yuklatilayotgan vazifalar hamda ularning yuqori darajadagi ijrosiga iliq fikrlar bildirildi.  

Yig‘ilish so‘ngida barcha hududiy boshqarma va muassasalarda harbiy intizom holatlarini chuqur va tanqidiy tahlil qilib, hisobot yig‘ilishlarini o‘tkazish hamda joylarda huquqni muhofaza qiluvchi organlar bilan hamkorlikdagi ishlarni yana-da kuchaytirish yuzasidan  topshiriqlar berildi.