Бугун Миллий гвардия марказий девонида бўлиб ўтган видео-селектор тарзидаги кенгайтирилган йиғилишда, тизимдаги шахсий таркиб ўртасида ҳарбий интизом ҳолати, ҳуқуқбузарликларни олдини олиш ҳамда йўл қўйилган камчиликларни ўз вақтида бартараф этиш чора-тадбирлари муҳокама қилинди.

Қўмондон ўринбосари полковник С.Мамаюсупов раислигида ўтказилган мазкур йиғилишда Ўзбекистон Республикаси Ҳарбий суди судяси О. Жумаев, Ҳарбий прокурорнинг биринчи ўринбосари адлия полковниги О. Холбоев ҳамда Давлат хавфсизлик хизмати масъуллари, Миллий гвардия таркибий ва ҳудудий бўлинма мутасадди раҳбарлари ҳамда соҳа вакиллари шунингдек, вилоятлардаги ҳарбий прокурорлар иштирок этишди.

Тадбир кун тартибига киритилган масалалар, хусусан 2023 йилнинг биринчи ярим йиллиги давомида шахсий таркиб ўртасидаги ҳарбий  интизом ҳолати, ҳуқуқбузарликлар сабаблари бу борада амалга оширилган ишлар, мавжуд камчиликлар  ҳамда  эришилган ютуқлар, шунингдек ҳарбий хизматчи ва ходимларнинг соғлиги билан боғлиқ муаммолар ва уларнинг ечимлари муҳокама қилинди. Унда ушбу йўналишларга масъул бошқарма бошлиқлари полковник Т. Қодиров, тиббиёт полковниги У. Юсупов ҳамда  бўлим бошлиғи подполковник М. Халиловларнинг ахбороти тингланди.

Шу билан бирга юқорида  қайд этилган меҳмонлар яъни ҳуқуқни муҳофаза қилувчи орган мутасаддилари ҳам  сўзга чиқиб, шахсий таркиб билан боғлиқ ножўя хатти-ҳаракатларга тўхталган ҳолда ҳарбий хизматчи ва ходимларни касб маданиятига риоя қилишлари, коррупция ва таъмагирлик иллатларидан сақланишлари, шахсий ва хизмат автомобилларини бошқаришда йўл ҳаракати қоидаларига қатъий риоя этишлари юзасидан зарур тавсиялар бердилар.

Шу қаторда бугунги кунда юртимиз аҳолисининг Миллий гвардияга бўлган ишончи ва  ҳукуматимиз томонидан юклатилаётган вазифалар ҳамда уларнинг юқори даражадаги ижросига илиқ фикрлар билдирилди.  

Йиғилиш сўнгида барча ҳудудий бошқарма ва муассасаларда ҳарбий интизом ҳолатларини чуқур ва танқидий таҳлил қилиб, ҳисобот йиғилишларини ўтказиш ҳамда жойларда ҳуқуқни муҳофаза қилувчи органлар билан ҳамкорликдаги ишларни янада кучайтириш юзасидан  топшириқлар берилди.