O‘zbekiston Respublikasi Prezidentining 2023-yil 21-dekabr kunidagi PQ-401-sonli "Oilalarni mustahkamlash va xotin-qizlarning faolligini oshirish bo’yicha qo‘shimcha chora-tadbirlar to‘g‘risida"gi Qarori ijrosini ta'minlash maqsadida O‘zbekiston Respublikasi Milliy gvardiyasi tizimida navbatdagi muhim tadbir tashkil etildi.

Xususan, Milliy gvardiya saflarida xizmat o‘tayotgan ayol harbiy xizmatchilar, ta'lim muassasalaridagi kursant va o‘quvchi qizlar hamda gvardiyachilarning oila a’zolari ishtirokida “Tarixni e’zozlagan, o‘z Vataniga fidoyi — Yangi O‘zbekiston ayollari” mavzusida davra suhbati o‘tkazildi.

Tadbirda Oliy Majlis Senatining Fan, ta’lim va sog‘liqni saqlash masalalari qo‘mitasi a’zosi G. Marufova, olima, falsafa fanlari doktori, professor J. Shermuhamedova, taniqli aktrisalar A. Yusupova va Y. Rajabova kabi mehmonlar ishtirok etdilar.

Davra suhbati davomida ishtirokchilar Yangi O‘zbekiston taraqqiyotida xotin-qizlarning tutgan o‘rni, ularning ijtimoiy faolligini oshirish, oilaviy qadriyatlarni mustahkamlash, harbiy sohada xizmat qilayotgan ayollarning jasorati hamda yosh avlod — o‘quvchi va kursant qizlarda vatanparvarlik ruhini shakllantirish masalalariga alohida e’tibor qaratdilar.

Tadbir ishtirokchilari o‘z nutqlarida ayollar faolligini rag‘batlantirish, ularning bilim va salohiyatini yuksaltirish borasida amalga oshirilayotgan islohotlarni yuksak baholab, bunday uchrashuvlarning yoshlarda mustahkam hayotiy pozitsiya va ma’naviy qadriyatlarni shakllantirishdagi o‘rni beqiyos ekanini ta’kidladilar.

Ishtirokchilar mehmonlarga o‘zlarini qiziqtirgan savollar bilan murojaat qilib, ularning hayoti, kasbiy faoliyati, jamiyatdagi o‘rni va erishgan yutuqlari bilan yaqindan tanishdilar. Ayniqsa, yosh avlod vakillari — o‘quvchi va kursant qizlar o‘z kelajakdagi kasb tanlovi, yetakchilik fazilatlarini rivojlantirish va jamiyatda faol ayol sifatida shakllanish borasida ko‘plab muhim maslahatlar oldilar.

Tadbir doirasida ayol harbiy xizmatchilarning yutuqlari, jasorati va mehnatlari namoyon etilgan videorolik namoyish etildi.

Davra suhbati ishtirokchilarda chuqur taassurot qoldirdi. Tadbir yakunida faol ishtirokchilar va mehmonlarga esdalik sovg‘alari topshirildi.

Bunday uchrashuvlar Yangi O‘zbekistonda ayollarning rolini yuksaltirish, ularni har tomonlama qo‘llab-quvvatlash hamda jamiyat hayotida faol ishtirokini ta’minlash yo‘lidagi amaliy qadamlar sifatida xizmat qilmoqda.