Tibbiyot xodimlari munosib rag‘batlantirildi
Maʼlumki, O‘zbekiston Respublikasining Qonuniga asosan noyabr oyining ikkinchi yakshanbasi “O‘zbekiston Respublikasi tibbiyot xodimlari kuni” kasb bayrami sifatida nishonlanib kelinmoqda. Bugun Milliy gvardiya ixtisoslashtirilgan o‘quv markazida o‘tkazilgan tantanali tadbir ham xalq salomatligini saqlash va mustahkamlashda fidoyilik bilan xizmat burchini ado etib kelayotgan soha xodimlarini munosib taqdirlash maqsadida tashkil etildi.
Tadbir avvalida so‘z olgan Milliy gvardiya qo‘mondoni o‘rinbosari hozirda davlatimiz tomonidan aholi salomatligini saqlashga qaratilayotgan eʼtibor va tibbiyot sohasini keng rivojlantirish yo‘lida amalga oshirilayotgan izchil islohotlar o‘z samarasini berayotganligiga alohida to‘xtildi. Ayniqsa, pandemiya davrida yana-da katta masʼuliyat va shijoat bilan burchini sidqidildan bajarayotgan shifokorlarning mehnatiga alohida urg‘u berib o‘tdi.
Shundan so‘ng, O‘zbekiston Respublikasi Milliy gvardiyasining III darajali “Namunali xizmatlari uchun” ko‘krak nishoni bilan Davlat xavfsizlik xizmati Chegara qo‘shinlari, Mudofaa, Ichki ishlar hamda Sog‘liqni saqlash vazirliklari, shuningdek, Milliy gvardiya Markaziy devoni va hududiy bo‘linmalarida harbiy va kasbiy burchini bajarib kelayotgan tibbiy xizmat xodimlari, shu bilan bir qatorda II darajali “Namunali xizmatlari uchun” ko‘krak nishoni bilan respublika Sanitariya-epidemiologik osoyishtalik va jamoat salomatligi xizmati xodimlari taqdirlandi.
Shu bilan birga, tizim shaxsiy tarkibi va ularning oila aʼzolariga sifatli va samarali tibbiy xizmat ko‘rsatib kelayotgan barcha soha xodimlariga Milliy gvardiyaning “Esdalik qo‘l soati”, “Faxriy yorliq”, pul mukofotlari hamda Sog‘liqni saqlash vaziri buyrug‘i bilan “Sog‘liqni saqlash aʼlochisi” ko‘krak nishoni va faxriy yorliqlar o‘z egalariga tantanali topshirildi.
Marosim so‘ngida ishtirokchilarga soha xodimlari faoliyatiga bag‘ishlangan videorolik hamda Maʼnaviyat va maʼrifat markazi ashula va raqs ansambli tomonidan tayyorlangan konsert dasturi namoyish etildi. Zamonaviy xizmat avtomobillarini hududiy boshqarmalarning tibbiyot bo‘limlariga topshirilishi bo‘lsa, bayramga munosib sovg‘a bo‘ldi desak mubolag‘a bo‘lmaydi.
Kasblar orasida eng ulug‘ va sharafli hisoblangan shifokorlik kasbi – inson hayoti va sog‘lig‘ini saqlashdek muqaddas vazifani ado etib keladi. Inson umri bo‘lsa har narsadan azizdir.
