“Tinchlik va xavfsizlikni taʼminlashda ayollarning o‘rni” mavzusida Surxondaryo viloyatida seminar-trening bo‘lib o‘tdi
Inson huquqlari bo‘yicha O‘zbekiston Respublikasi Milliy markazi tomonidan Yevropada xavfsizlik va hamkorlik tashkiloti bilan hamkorlikda Surxondaryo viloyati Termiz shahrida "Tinchlik va xavfsizlikni taʼminlashda ayollarning o‘rni" mavzusida seminar-trening o‘tkazildi.
Ushbu trening Inson huquqlari bo‘yicha O‘zbekiston Respublikasi Milliy markazi direktorining o‘rinbosari Dilnoza Muratova va YEXHTning O‘zbekistondagi loyihalari koordinatori Antti Karttunen raisligida bo‘lib o‘tdi.
Mazkur tadbirda O‘zbekiston Respublikasi oila va xotin-qizlar qo‘mitasi, Oliy sud, Bosh prokuratura, Bojxona, IIV, mudofaa vazirligi vakillari, shuningdek, Milliy gvardiya Xalqaro hamkorlik boshqarmasi boshlig‘i polkovnik N.Muinova va Milliy gvardiya harbiy xizmatchilarining oila aʼzolari bilan ishlash bo‘yicha masʼul ofitseri podpolkovnik B.Ashirmatovalar o‘z maʼruzalari bilan ishtirok etishdi.
Unda, so‘nggi yillarda amalga oshirilgan kompleks islohotlar natijasida O‘zbekistonda jamiyat hayoti va faoliyatining barcha sohalarida ayollar uchun teng huquq va imkoniyatlar hamda ularni taʼminlash uchun mustahkam huquqiy asoslar yaratilgani taʼkidlandi. Xususan, maʼruzachilar tomonidan, O‘zbekistonda gender tengligi masalasi davlat siyosati darajasiga ko‘tarilgani va ushbu muhim masalalar “O‘zbekiston-2030” strategiyasida o‘z aksini topganiga alohida urg‘u berildi.
