“Тинчлик ва хавфсизликни таъминлашда аёлларнинг ўрни” мавзусида Сурхондарё вилоятида семинар-тренинг бўлиб ўтди
Инсон ҳуқуқлари бўйича Ўзбекистон Республикаси Миллий маркази томонидан Европада хавфсизлик ва ҳамкорлик ташкилоти билан ҳамкорликда Сурхондарё вилояти Термиз шаҳрида "Тинчлик ва хавфсизликни таъминлашда аёлларнинг ўрни" мавзусида семинар-тренинг ўтказилди.
Ушбу тренинг Инсон ҳуқуқлари бўйича Ўзбекистон Республикаси Миллий маркази директорининг ўринбосари Дилноза Муратова ва ЕХҲТнинг Ўзбекистондаги лойиҳалари координатори Антти Карттунен раислигида бўлиб ўтди.
Мазкур тадбирда Ўзбекистон Республикаси оила ва хотин-қизлар қўмитаси, Олий суд, Бош прокуратура, Божхона, ИИВ, мудофаа вазирлиги вакиллари, шунингдек, Миллий гвардия Халқаро ҳамкорлик бошқармаси бошлиғи полковник Н.Муинова ва Миллий гвардия ҳарбий хизматчиларининг оила аъзолари билан ишлаш бўйича масъул офицери подполковник Б.Аширматовалар ўз маърузалари билан иштирок этишди.
Унда, сўнгги йилларда амалга оширилган комплекс ислоҳотлар натижасида Ўзбекистонда жамият ҳаёти ва фаолиятининг барча соҳаларида аёллар учун тенг ҳуқуқ ва имкониятлар ҳамда уларни таъминлаш учун мустаҳкам ҳуқуқий асослар яратилгани таъкидланди. Хусусан, маърузачилар томонидан, Ўзбекистонда гендер тенглиги масаласи давлат сиёсати даражасига кўтарилгани ва ушбу муҳим масалалар "Ўзбекистон-2030" стратегиясида ўз аксини топганига алоҳида урғу берилди.
