Toshkent shahrida Milliy gvardiya va ichki ishlar hodimlari хamkorligida olib borilgan tezkor tadbir natijasida zargarlik do‘konidan o‘g‘irlangan 49 million so‘mlik tilla buyumlari o‘z egasiga qaytarildi.
Poytaxtimizning Shayxontohur tumani IIO FMBga Olmazor tumanida yashovchi fuqaro M.S. tomonidan murojaat kelib tushgan.
Unga ko‘ra fuqaro, o‘zi sotuvchi bo‘lib ishlaydigan, “Eski Juva” bozorida joylashgan zargarlik do‘koniga joriy yilning 28-aprel kuni nomaʼlum ayol o‘smir bola bilan kelgani va zargarlik buyumlarini uzoq vaqt ko‘rib, 49 million so‘mlik tilla buyumlarni tanlagani hamda sotib olish istagini bildirib qo‘liga olgan holda o‘g‘liga bergani, o‘g‘li esa darhol nomaʼlum tomonga qochib chiqib ketgani haqida maʼlum qilgan.
Dastlabki surishtiruvlar natijasida ushbu g‘araz niyatli ayol Qo‘qon shahrida yashovchi 49 yoshli X. G. ekanligi, yonidagi o‘smir esa uning 12 yoshli o‘g‘li I. A. ekanligi aniqlangan.
Olib borilgan hamkorlikdagi tezkor tadbirlar natijasida Milliy gvardiya xodimlari tomonidan voqea joyidan qochib ketgan voyaga yetmagan bola qo‘lga olinib, qimmatbaho buyumlar o‘rnatilgan tartibda o‘z egasiga qaytarilgan.
Hozirda ichki ishlar organlari tomonidan surishtiruv ishlari davom ettirilmoqda.
