Toshkentda Chorsu bozorida o‘g‘irlikda gumonlanayotgan shaxs qo‘lga olindi
Joriy yil 8 oktyabr kuni Chorsu bozorida joylashgan zargarlik do‘konlaridan birining rahbari Milliy gvardiya harbiy xizmatchilari va ichki ishlar xodimlariga murojaat qilib, soat 11:35 larda nomaʼlum shaxs sotuvchining mijozlarga xizmat ko‘rsatayotganidan foydalanib, qiymati 1 million 920 ming so‘mlik tilla uzukni o‘g‘irlab ketganini maʼlum qilgan.
O‘g‘irlik sodir bo‘lgan jarayon do‘konga o‘rnatilgan videokuzatuv kameralari tomonidan yozib olingan bo‘lib, 14-oktyabr kuni Milliy gvardiya harbiy xizmatchilari va ichki ishlar organlari xodimlari bozorda xizmat olib borayotgan vaqtda uzuk o‘g‘irlagan shaxsga tashqi ko‘rinishi o‘xshash fuqaroni payqab qolgan.
Gumonlanuvchi qo‘lga olinib, ichki ishlar bo‘limiga olib ketilgan. So‘roq davomida olib kelingan shaxsning tashqi ko‘rinishi videokuzatuv kamerasiga tushib qolgan gumonlanuvchining tasvirlari bilan solishtirilgan va o‘xshashlik tasdiqlangan.
Ushlangan fuqaro shaxsiga aniqlik kiritilganda u poytaxtlik 30 yoshli T.O. ekani maʼlum bo‘ldi. So‘roq paytida qo‘lga olingan shaxs uzukni aynan u o‘g‘irlaganini tan olib, o‘g‘irlangan buyumlarni uyda saqlayotganini bildirgan. Uzuk zargarlik do‘koni rahbariyatiga qaytarilgan.
Hozirgi kunda o‘g‘irlik holati bo‘yicha ichki ishlar organlari tomonidan tergov harakatlari olib borilmoqda.
