Тошкентда Чорсу бозорида ўғирликда гумонланаётган шахс қўлга олинди
Жорий йил 8 октябрь куни Чорсу бозорида жойлашган заргарлик дўконларидан бирининг раҳбари Миллий гвардия ҳарбий хизматчилари ва ички ишлар ходимларига мурожаат қилиб, соат 11:35 ларда номаълум шахс сотувчининг мижозларга хизмат кўрсатаётганидан фойдаланиб, қиймати 1 миллион 920 минг сўмлик тилла узукни ўғирлаб кетганини маълум қилган.
Ўғирлик содир бўлган жараён дўконга ўрнатилган видеокузатув камералари томонидан ёзиб олинган бўлиб, 14-октябрь куни Миллий гвардия ҳарбий хизматчилари ва ички ишлар органлари ходимлари бозорда хизмат олиб бораётган вақтда узук ўғирлаган шахсга ташқи кўриниши ўхшаш фуқарони пайқаб қолган.
Гумонланувчи қўлга олиниб, ички ишлар бўлимига олиб кетилган. Сўроқ давомида олиб келинган шахснинг ташқи кўриниши видеокузатув камерасига тушиб қолган гумонланувчининг тасвирлари билан солиштирилган ва ўхшашлик тасдиқланган.
Ушланган фуқаро шахсига аниқлик киритилганда у пойтахтлик 30 ёшли Т.О. экани маълум бўлди. Сўроқ пайтида қўлга олинган шахс узукни айнан у ўғирлаганини тан олиб, ўғирланган буюмларни уйда сақлаётганини билдирган. Узук заргарлик дўкони раҳбариятига қайтарилган.
Ҳозирги кунда ўғирлик ҳолати бўйича ички ишлар органлари томонидан тергов ҳаракатлари олиб борилмоқда.
