“Triatlon” va “Ot sporti” bo‘yicha xalqaro musobaqa g‘oliblari taqdirlandi
Bugungi kunda davlatimiz tomonidan yoshlarga ko‘rsatilayotgan eʼtibor, yaratib berilayotgan shart-sharoitlar o‘z samarasini bermoqda. Ana shu eʼtiborning natijasi o‘laroq sportchilarimizning dunyo arenalarida qo‘lga kiritayotgan yutuqlarining salmog‘i yildan yilga ortib bormoqda. Ayniqsa, ot sporti va triatlon sport turlari bo‘yicha yoshlar tomonidan tarixiy natijalar qayd etilayotgani quvonchli holdir.
Bugun Milliy gvardiya Ixtisoslashtirilgan o‘quv markazi binosida o‘tkazilgan tadbir ham aynan shu sport turlari sovrindorlarini taqdirlashga bag‘ishlandi.
Tadbirda O‘zbekiston triatlon federatsiyasi raisi o‘rinbosari E.Kun, Yilqichilik va ot sporti federatsiyasi raisi B.Gaziyev, Uloq-ko‘pkari federatsiyasi raisi o‘rinbosari E.Abzalov, shuningdek, terma jamoa murabbiylari, sportchilar va milliy gvardiya qo‘mondonligi ishtirok etdi.
Taqdirlash marosimi Milliy gvardiyaning hududiy boshqarmalarida ham onlayn tarzda kuzatib borildi.
Tantanali marosim avvalida Milliy gvardiya qo‘mondoni, general-mayor R.Djurayev barcha g‘olib va sovrindorlarni yana bir bor yuksak va tarixiy g‘alaba bilan muborakbod etib, kelgusida bundanda yuqori cho‘qqilarni zabt etishlarida ulkan zafarlar tiladi.
Shundan so‘ng, Rossiya Federatsiyasining Moskva shahrida o‘tkazilgan Ot sporti bo‘yicha xalqaro musobaqada O‘zbekiston terma jamoasi tarkibida N.Tuyakbayev “Lanselotta”, U.Kamilov “Numero Uno Rafayel”, B.Qurbonov “King Kornet-L”, O.Sobirjonov “Mets ViDji” laqabli otlari bilan ishtirok etib, faxrli birinchi o‘rinni qo‘lga kiritgan Milliy gvardiya ot sporti bo‘yicha respublika oliy sport mahorati maktabi sportchi chavandozlari hamda terma jamoa bosh murabbiyi va federatsiya rahbarlari Milliy gvardiyaning III darajali “Namunali xizmatlari uchun” ko‘krak nishoni bilan taqdirlandi.
Shu bilan birga, tadbirda Milliy gvardiya Navoiy viloyati bo‘yicha boshqarmasidan qatnashayotgan O‘zbekiston Respublikasi Triatlon federatsiyasi aʼzosi – Jamoat xavfsizligi universiteti xodimi Alina Hakimova joriy yil 3 iyul kuni Ispaniyaning Kanar orollari mintaqasida joylashgan “Lansarote”orolida harbiylar o‘rtasida sportning triatlon turi bo‘yicha “Ironman” XXII - Jahon chempionati musobaqasida ayollar o‘rtasida o‘zining shaxsiy birinchiligi bo‘yicha faxrli 2-o‘rinni egallashga muvaffaq bo‘lganligi uchun Qo‘mondonlik tomonidan munosib taqdirlandi. Unga ilk ofitserlik “leytenant” unvoni, “Alvon beret” kiyish huquqi hamda ipoteka imtiyozli krediti asosida 3-xonali uy topshirildi.
Triatlon federatsiyasi raisi o‘rinbosari E.Kun hamda terma jamoa bosh murabbiysi V.Zemsovlar ham ko‘rsatgan xizmatlari uchun alohida taqdirlandi.
Taqdirlangan sportchi va murabbiylar orasida so‘z olganlar, mamlakatimizda sportni rivojlantirish yo‘lida olib borilayotgan islohotlar, xususan, ot sporti va triatlon sport turlariga qaratilayotgan eʼtibor ularni yana-da yuqori marralarni zabt etishga undashini bildirishdi.
Tadbir so‘ngida Milliy gvardiya qo‘mondoni bu kabi yutuqlarga erishish sportchilardan tinimsiz mehnat va shijoat talab qilsa, joylardagi mutasaddi rahbarlardan barcha zarur shart-sharoitlarni yaratib berish talab etishini taʼkidladi. Shuningdek, yuqoridagi sport turlarini rivojlantirish bo‘yicha amalga oshirilayotgan ishlar yuzasidan ayrim viloyatlarga tanqidiy baho berib, istiqboldagi vazifalar bo‘yicha masʼullarga aniq topshiriqlar berildi.
