“Триатлон” ва “От спорти” бўйича халқаро мусобақа ғолиблари тақдирланди
Бугунги кунда давлатимиз томонидан ёшларга кўрсатилаётган эътибор, яратиб берилаётган шарт-шароитлар ўз самарасини бермоқда. Ана шу эътиборнинг натижаси ўлароқ спортчиларимизнинг дунё ареналарида қўлга киритаётган ютуқларининг салмоғи йилдан йилга ортиб бормоқда. Айниқса, от спорти ва триатлон спорт турлари бўйича ёшлар томонидан тарихий натижалар қайд этилаётгани қувончли ҳолдир.
Бугун Миллий гвардия Ихтисослаштирилган ўқув маркази биносида ўтказилган тадбир ҳам айнан шу спорт турлари совриндорларини тақдирлашга бағишланди.
Тадбирда Ўзбекистон триатлон федерацияси раиси ўринбосари Е.Кун, Йилқичилик ва от спорти федерацияси раиси Б.Газиев, Улоқ-кўпкари федерацияси раиси ўринбосари Э.Абзалов, шунингдек, терма жамоа мураббийлари, спортчилар ва миллий гвардия қўмондонлиги иштирок этди.
Тақдирлаш маросими Миллий гвардиянинг ҳудудий бошқармаларида ҳам онлайн тарзда кузатиб борилди.
Тантанали маросим аввалида Миллий гвардия қўмондони, генерал-майор Р.Джураев барча ғолиб ва совриндорларни яна бир бор юксак ва тарихий ғалаба билан муборакбод этиб, келгусида бунданда юқори чўққиларни забт этишларида улкан зафарлар тилади.
Шундан сўнг, Россия Федерациясининг Москва шаҳрида ўтказилган От спорти бўйича халқаро мусобақада Ўзбекистон терма жамоаси таркибида Н.Туякбаев “Ланселотта”, У.Камилов “Нумеро Уно Рафаель”, Б.Қурбонов “Кинг Корнет-Л”, О.Собиржонов “Метс ВиДжи” лақабли отлари билан иштирок этиб, фахрли биринчи ўринни қўлга киритган Миллий гвардия от спорти бўйича республика олий спорт маҳорати мактаби спортчи чавандозлари ҳамда терма жамоа бош мураббийи ва федерация раҳбарлари Миллий гвардиянинг III даражали “Намунали хизматлари учун” кўкрак нишони билан тақдирланди.
Шу билан бирга, тадбирда Миллий гвардия Навоий вилояти бўйича бошқармасидан қатнашаётган Ўзбекистон Республикаси Триатлон федерацияси аъзоси – Жамоат хавфсизлиги университети ходими Алина Ҳакимова жорий йил 3 июль куни Испаниянинг Канар ороллари минтақасида жойлашган “Лансароте”оролида ҳарбийлар ўртасида спортнинг триатлон тури бўйича “Ironman” ХХII - Жаҳон чемпионати мусобақасида аёллар ўртасида ўзининг шахсий биринчилиги бўйича фахрли 2-ўринни эгаллашга муваффақ бўлганлиги учун Қўмондонлик томонидан муносиб тақдирланди. Унга илк офицерлик “лейтенант” унвони, “Алвон берет” кийиш ҳуқуқи ҳамда ипотека имтиёзли кредити асосида 3-хонали уй топширилди.
Триатлон федерацияси раиси ўринбосари Е.Кун ҳамда терма жамоа бош мураббийси В.Земцовлар ҳам кўрсатган хизматлари учун алоҳида тақдирланди.
Тақдирланган спортчи ва мураббийлар орасида сўз олганлар, мамлакатимизда спортни ривожлантириш йўлида олиб борилаётган ислоҳотлар, хусусан, от спорти ва триатлон спорт турларига қаратилаётган эътибор уларни янада юқори марраларни забт этишга ундашини билдиришди.
Тадбир сўнгида Миллий гвардия қўмондони бу каби ютуқларга эришиш спортчилардан тинимсиз меҳнат ва шижоат талаб қилса, жойлардаги мутасадди раҳбарлардан барча зарур шарт-шароитларни яратиб бериш талаб этишини таъкидлади. Шунингдек, юқоридаги спорт турларини ривожлантириш бўйича амалга оширилаётган ишлар юзасидан айрим вилоятларга танқидий баҳо бериб, истиқболдаги вазифалар бўйича масъулларга аниқ топшириқлар берилди.
