Milliy gvardiya tomonidan qator tashkilotlar hamkorligida odob-axloq qoidalariga oid o‘quv-seminari o‘tkazildi.
O‘zbekiston Respublikasi Milliy gvardiyasi markaziy devonida tizimdagi barcha shaxsiy tarkibning xizmat faoliyatiga oid va xizmatdan tashqari odob-axloqi hamda jamoatchilik bilan munosabatlarga doir qoidalarga rioya etilishini taʼminlash borasidagi o‘quv-seminari bo‘lib o‘tdi. Unda Milliy gvardiya qo‘mondoni o‘rinbosari polkovnik S.Mamayusupov, O‘zbekiston Respublikasi Prezidenti huzuridagi davlat xizmatini rivojlantirish agentligi masʼul xodimi O‘.Xamroyev, Korrupsiyaga qarshi kurashish agentligi boshqarmasi xodimlari B.Rahmonov hamda A.Yunusovlar ishtirok etib, tadbirni o‘zlarining mavzuga oid maʼruzalari bilan olib borishdi.
"Davlat fuqarolik xizmatlari to‘g‘risidagi" Qonun, O‘zbekiston Respublikasi Vazirlar Mahkamasining "Davlat fuqarolik xizmatchilari tomonidan odob-axloq qoidalariga rioya etilishini taʼminlash bo‘yicha qo‘shimcha chora-tadbirlar to‘g‘risida"gi qarori va ushbu hujjatlar asosida ishlab chiqilgan Milliy gvardiya qo‘mondonining "O‘zbekiston Respublikasi Milliy gvardiyasi shaxsiy tarkibining odob-axloq qoidalarini tasdiqlash to‘g‘risida"gi buyrug‘i mazmun mohiyati va talablari hududlardagi Milliy gvardiya bo‘linmalari tomonidan on-layn video-konferens aloqa tarzida ishtirok etgan harbiy xizmatchi va xodimlariga yetkazildi.
Shuni taʼkidlash joizki, odob-axloq qoidalari – egallab turgan lavozimidan qatʼiy nazar Milliy gvardiya shaxsiy tarkibi uchun majburiy bo‘lgan, yuksak kasbiy madaniyatni shakllantirish, jamoatchilik ongida Milliy gvardiya organlariga hurmat va ishonchni oshirishga, shuningdek, shaxsiy tarkibining odob-axloq qoidalariga zid bo‘lgan xatti-harakatlarining oldini olishga va jamiyatda o‘rnatilgan odob-axloq normalariga qatʼiy rioya qilish ruhida tarbiyalashga qaratilgan hujjat sanalishi notiqlar tomonidan taʼkidlab o‘tildi.
