Ўзбекистон Республикаси Миллий гвардияси марказий девонида тизимдаги барча шахсий таркибнинг хизмат фаолиятига оид ва хизматдан ташқари одоб-ахлоқи ҳамда жамоатчилик билан муносабатларга доир қоидаларга риоя этилишини таъминлаш борасидаги ўқув-семинари бўлиб ўтди. Унда Миллий гвардия қўмондони ўринбосари полковник С.Мамаюсупов, Ўзбекистон Республикаси Президенти ҳузуридаги давлат хизматини ривожлантириш агентлиги масъул ходими Ў.Хамроев, Коррупцияга қарши курашиш агентлиги бошқармаси ходимлари Б.Раҳмонов ҳамда А.Юнусовлар иштирок этиб, тадбирни ўзларининг мавзуга оид маърузалари билан олиб боришди.
"Давлат фуқаролик хизматлари тўғрисидаги" Қонун, Ўзбекистон Республикаси Вазирлар Маҳкамасининг "Давлат фуқаролик хизматчилари томонидан одоб-ахлоқ қоидаларига риоя этилишини таъминлаш бўйича қўшимча чора-тадбирлар тўғрисида"ги қарори ва ушбу ҳужжатлар асосида ишлаб чиқилган Миллий гвардия қўмондонининг "Ўзбекистон Республикаси Миллий гвардияси шахсий таркибининг одоб-ахлоқ қоидаларини тасдиқлаш тўғрисида"ги буйруғи мазмун моҳияти ва талаблари ҳудудлардаги Миллий гвардия бўлинмалари томонидан он-лайн видео-конференц алоқа тарзида иштирок этган ҳарбий хизматчи ва ходимларига етказилди.
Шуни таъкидлаш жоизки, одоб-ахлоқ қоидалари – эгаллаб турган лавозимидан қатъий назар Миллий гвардия шахсий таркиби учун мажбурий бўлган, юксак касбий маданиятни шакллантириш, жамоатчилик онгида Миллий гвардия органларига ҳурмат ва ишончни оширишга, шунингдек, шахсий таркибининг одоб-ахлоқ қоидаларига зид бўлган хатти-ҳаракатларининг олдини олишга ва жамиятда ўрнатилган одоб-ахлоқ нормаларига қатъий риоя қилиш руҳида тарбиялашга қаратилган ҳужжат саналиши нотиқлар томонидан таъкидлаб ўтилди.