Chaqiruvga qadar boshlang‘ich tayyorgarlik fani o‘qituvchilari uchun o‘quv yig‘ini yakunlanib, sertifikatlar topshirildi
Joriy yilning 26-28 avgust kunlari respublikamizdagi umumtaʼlim maktablarining “Harbiy-vatanparvarlik” va “Yosh gvardiyachilar” sinflari mavjud bo‘lgan umumiy o‘rta taʼlimi maktablarining chaqiruvga qadar boshlang‘ich tayyorgarlik fani o‘qituvchilari uchun o‘quv yig‘ini o‘tkazildi.
Milliy gvardiya hamda Maktabgacha va maktab taʼlimi vazirligi hamkorligida tashkil etilgan o‘quv yig‘ini Milliy gvardiyaning Qoraqalpog‘iston Respublikasi, Toshkent shahri, Jizzax va Farg‘ona viloyati mintaqaviy o‘quv markazlarida bo‘lib o‘tdi.
O‘quv mashg‘ulotlari davomida o‘qituvchilar chaqiruvga qadar boshlang‘ich tayyorgarlik fanini o‘qitish metodikasi, harbiy poligonlarda amaliy mashg‘ulotlar o‘tkazish bo‘yicha maʼruzalarni tinglab, harbiy qism va harbiy taʼlim muassasalariga ekskursiyalarni to‘g‘ri tashkil etish bo‘yicha maslahatlar olishdi.
Bundan tashqari, o‘quv yig‘ini ishtirokchilariga o‘smirlar psixologiyasi asoslari bo‘yicha saboqlar berildi.
Bugun mazkur o‘quv yig‘in yakuni munosabati bilan tantanali tadbir o‘tkazildi. Malaka oshirgan o‘qituvchilarga sertifikatlar orkestr sadolari ostida mutasaddilar tomonidan topshirildi.
