Чақирувга қадар бошланғич тайёргарлик фани ўқитувчилари учун ўқув йиғини якунланиб, сертификатлар топширилди
Жорий йилнинг 26-28 август кунлари республикамиздаги умумтаълим мактабларининг “Ҳарбий-ватанпарварлик” ва “Ёш гвардиячилар” синфлари мавжуд бўлган умумий ўрта таълими мактабларининг чақирувга қадар бошланғич тайёргарлик фани ўқитувчилари учун ўқув йиғини ўтказилди.
Миллий гвардия ҳамда Мактабгача ва мактаб таълими вазирлиги ҳамкорлигида ташкил этилган ўқув йиғини Миллий гвардиянинг Қорақалпоғистон Республикаси, Тошкент шаҳри, Жиззах ва Фарғона вилояти минтақавий ўқув марказларида бўлиб ўтди.
Ўқув машғулотлари давомида ўқитувчилар чақирувга қадар бошланғич тайёргарлик фанини ўқитиш методикаси, ҳарбий полигонларда амалий машғулотлар ўтказиш бўйича маърузаларни тинглаб, ҳарбий қисм ва ҳарбий таълим муассасаларига экскурсияларни тўғри ташкил этиш бўйича маслаҳатлар олишди.
Бундан ташқари, ўқув йиғини иштирокчиларига ўсмирлар психологияси асослари бўйича сабоқлар берилди.
Бугун мазкур ўқув йиғин якуни муносабати билан тантанали тадбир ўтказилди. Малака оширган ўқитувчиларга сертификатлар оркестр садолари остида мутасаддилар томонидан топширилди.
