UYUSHMAGAN YОSHLARNI BIR MAQSAD SARI BIRLASHTIRGAN MUSOBAQA
Yoshlarning sportga bo‘lgan qiziqishlarini oshirish, sog‘lom turmush tarzini targ‘ib etish maqsadida, Nukus shahridagi mahallalarda istiqomat qiluvchi uyushmagan yoshlar ishtirokida sportning mini futbol turi bo‘yicha Qoraqalpog‘iston Respublikasi Davlat Soliq boshqarmasi bilan birgalikda “Qoraqalpog‘iston Respublikasi bo‘yicha Milliy gvardiya boshqarmasi boshlig‘i kubogi” uchun sport musobaqasi o‘tkazildi.
Mazkur sport musobaqasida 8 ta mahallaning uyushmagan yoshlari qatnashib, jismoniy imkoniyat va mahoratlarini namoyish etdilar. Musobaqa yakunida uchinchi o‘rinni “Qo‘sh buloq” mahallasi, ikkinchi o‘rinni “Temir yo‘l” mahallasi, birinchi o‘rinni “Do‘stlik mahallasi” jamoalari qo‘lga kiritdi.
Musobaqa yakunida g‘olib jamoalarga Qoraqalpog‘iston Respublikasi bo‘yicha Milliy gvardiya boshqarmasi va Qoraqalpog‘iston Respublikasi Davlat Soliq boshqarmasi boshliqlari tomonidan kubok, medal va qimmatbaho sovg‘alar topshirildi.
Tashkillashtirilayotgan bunday tadbirlar yoshlarni bir maqsad sari jamlash, ularni vatanparvarlik ruhida tarbiyalash, qalblarida yurt taqdiriga daxldorlik hissini oshirish va sportga jalb qilishi bilan ahamiyatlidir.
